Гістарычная дастаўка: да Зямлі вяртаецца касмічны апарат, які сабраў узоры глебы з астэроіда Бэну

Апарат правёў у космасе сем гадоў.

Да Зямлі вяртаецца касмічны апарат OSIRIS-REx, які сем гадоў правёў у космасе і сабраў узоры глебы з астэроіда Бэну. Пра гэта паведаміў сайт NASA.

Спецыялісты NASA рыхтуюцца сустракаць «гістарычную дастаўку» 24 верасня. У гэты дзень OSIRIS-REx спусціць на Зямлю на парашуце капсулу з сабранымі ўзорамі. Чакаецца, што капсула прызямліцца ў пустыні Юта.

«Пасля сямі гадоў знаходжання ў космасе, уключаючы пасадку на Бэну для збору пылу і камянёў, гэтая бясстрашная місія збіраецца вырашыць адну з самых складаных задач: даставіць узор астэроіда на Зямлю, абараніўшы яго ад спякоты, вібрацый і зямных забруджванняў», – гаворыцца ў рэлізе.

Гэта дастаўка стане першай місіяй ЗША па вяртанні ўзору астэроіда на Зямлю, паведамілі ў NASA.

Найбліжэйшыя шэсць месяцаў каманда місіі будзе адпрацоўваць працэдуры, неабходныя, каб сустрэць капсулу ў пустыні і даставіць ўзоры ў новую лабараторыю, пабудаваную для гэтага матэрыялу ў касмічным цэнтры NASA ў Х'юстане.

Узоры, сабраныя OSIRIS-REx, могуць дапамагчы ў вывучэнні фармавання Сонечнай сістэмы, мяркуюць у NASA.

Калязямны астэроід Бэну - гэта груда камянёў і валуноў, якія засталіся пасля фармавання Сонечнай сістэмы, ён мае друзлую структуру - калі ў 2020 годзе касмічны апарат збіраў яго глебу, «рука» пагрузілася ў яго глебу нашмат глыбей, чым чакалася, распавялі ў NASA.

Навукоўцы мяркуюць, што такія астэроіды як Бэну могуць распасціся ў атмасферы Зямлі і тым самым уяўляюць сабой «іншы тып небяспекі, чым цвёрдыя».