Расея заявіла аб скіданні Лукашэнкі беларускімі ахвотнікамі

Дыктатара палохаюць перакідваннем баявых груп з Украіны ў Беларусь.

Масква не выключае магчымасць перакідвання «дыверсантаў з Украіны» ў Беларусь для «скідання дзейнага кіраўніцтва». Пра гэта паведаміў намеснік кіраўніка МЗС Расеі Міхаіл Галузін 29 сакавіка ў інтэрв'ю RTVI.

Намеснік кіраўніка расейскага замежнапалітычнага міністэрства падкрэсліў, што ў апошнія месяцы "істотна ўзмацнілася жорсткасць рыторыкі" прадстаўнікоў беларускіх ахвотнікаў, што ваююць у складзе Узброеных сіл Украіны, якія "шчыра кажуць, што ў будучыні плануюць ужыць свой баявы досвед для гвалтоўнага скідання дзейнага беларускага кіраўніцтва".

- У сувязі з гэтым нельга выключаць магчымага перакідвання ў краіну такіх дыверсійных груп, - сказаў ён.

Намеснік кіраўніка МЗС Расеі адзначыў, што беларускія ўзброеныя ўстановы і спецыяльныя службы пры падтрымцы расейска-беларускай рэгіянальнай групоўкі войскаў «маюць у поўнай меры ўлічваць такія рызыкі і пры неабходнасці даць адпор як адрасным правакацыям, так і "поўнамаштабнаму ўварванню" супраціўніка на тэрыторыю Беларусі».

- Пры гэтым само сабой размяшчэнне Рэгіянальнай групоўкі войскаў на тэрыторыі Беларусі з'яўляецца магутным стрымальным чыннікам для ўкраінскіх падраздзяленняў, вымушаных захоўваць значныя рэзэрвы на гэтым кірунку замест таго, каб перакінуць іх на паўднёвы ўсход. Такім чынам, нават не ўдзельнічаючы наўпрост у баявых сутыкненнях, дыслакаваныя ў рэспубліцы (Беларусі - рэдакцыя) дадатковыя вайсковыя кантынгенты робяць сур'ёзны ўплыў на хаду «СВА» (спецыяльнай вайсковай аперацыі - так у Расеі называюць поўнамаштабнае ўварванне ва Украіну - рэдакцыя), спрыяюць дасягненню яе задач і мэт, - сказаў Галузін.