Тураўскіх быкоў зноў пераселяць: чым скончылася гісторыя на Палессі

Быкоў маюць сабраць у адным месцы і перавезці.

Дзікае быдла пароды Хек, які апынуўся ў палоне ў «вялікай вады» ў Жыткавіцкім раёне, у большасці сваёй перажыло незвычайна доўгую паводку 2023 года. Мясцовы жыхар расказаў tochka.by, што быкі сапраўды змаглі выбрацца з абмежаванай прасторы і цяпер перамяшчаюцца статкамі.

Мясцовы жыхар захаваў адно з іх на відэа. Ён налічыў 12 галоў і дадаў, што прыкладна столькі ж аднавяскоўцы бачылі ў іншым месцы.

Журналісты патэлефанавалі ў Жыткавіцкі райвыканкам, каб даведацца падрабязнасці.

Са слоў прадстаўніка мясцовай улады, вада сышла імкліва. І цяпер быкам нішто не пагражае. Работнікі тутэйшай гаспадаркі налічылі 21 асобіну. Але, каб вызначыць дакладную колькасць, жывёл маюць сабраць у адным месцы. Для гэтага зрабілі спецыяльны загон, дзе дзяжурыць работнік ААТ «Тураўшчына».

«Спрабуем ежай іх прывабіць», - удакладніла крыніца.

У далейшым жывёлу плануюць перавезці ў Берасцейскую вобласць. Дамоўленасць аб гэтым дасягнутая з адміністрацыяй біялагічнага заказніка «Спораўскае».

Прыродны аб'ект займае 19 тысяч гектараў на тэрыторыі Бярозаўскага, Драгічынскага, Іванаўскага і Івацэвіцкага раёнаў. Ён уключае найбуйнейшы масіў нізінных балот у пойме ракі Ясельды.

Гэта значыць, тураўскія быкі прадоўжаць выконваць сваю задачу на новым месцы - будуць ствараць умовы для біяразнастайнасці пойменных лугоў, ядучы высокую траву і зараснікі вербалозу.

Судзячы з усяго, тамака для нашчадкаў старажытных тураў будзе больш прасторы і ежы ў выпадку паўтарэння такіх маштабных паводак. Да таго ж жывёлы апынуцца ў яшчэ больш дзікім асяроддзі ўдалечыні ад людзей. З ростам папуляцыі такое суседства можа быць небяспечным для чалавека.

Што турападобныя быкі робяць на Палессі

Пятнаццаць асобін турападобнай жывёлы пароды Хека перавезлі ў Жыткавіцкі раён з латвійскага нацыянальнага парку «Кемеры» ў 2020 годзе. Яны з'явіліся ў рамках міжнароднага праекта ПРААН/ГЭФ 2Ветландс» для аднаўлення біяразнастайнасці пойменных лугоў Прыпяці.

Увесну 2023 года разліў рэк Прыпяць і Ствіга прывёў да сур'ёзнай паводкі. Жывёлы апынуліся адрэзаныя вадой утвораных астраўках. Некаторыя цяляты загінулі праз недахоп ежы або ў спробах перабрацца на вялікую зямлю ўплаў.

Серыял, атрымліваецца, скончыўся. Ці будзе ў яго другі сезон, пакажа вясна 2024 года.