Як кот Клаўдзіі Шыфер зацьміў усіх зорак на прэм'еры фільма «Аргайл»

Шыфер прынесла Чыпа, паколькі ён таксама зняўся ў фільме.

Такіх галівудскіх зорак, як Сэмюэль Л. Джэксан, Брайс Далас Ховард і Генры Кавіл, няпроста адсунуць на другі план, але на прэм'еры фільма «Аргайл» іх зацьміў Чып – кот супермадэлькі Клаўдзіі Шыфер, піша ВВС.

На другіх ролях у той вечар былі і такія знакамітасці, як Дуа Ліпа, Сэм Рокуэл, Браян Крэнстан і Брайс Далас, якія таксама прыйшлі на прэм'еру шпіёнскай камедыі «Аргайл» на Лестэр-сквер у Лондане.

Шыфер прынесла Чыпа, паколькі ён таксама зняўся ў фільме, пастаўленым яе мужам, і кот, якому не прывыкаць да папулярнасці, забраў усю ўвагу фатографаў, аператараў і проста журналістаў.

У Чыпа 13 тыс. падпісчыкаў у Інстаграме, і, само сабой, там таксама з'явіліся фатаграфіі з гэтай прэм'еры, якая адбылася 24 студзеня.

Чыпа можна было разгледзець праз выпуклы пластыкавы ілюмінатар у заплечніку з фірмовымі для фільма ўзорамі ў выглядзе ромбаў.

Такія заплечнікі вырабляюцца на замову – спецыяльна для бяспечнага транспартавання катоў.

Чып сядзеў у заплечніку, нібы касманаўт у ракеце перад стартам, але нікуды, вядома, не стартаваў.

Няясна нават, пра што ён думаў. Магчыма, пра тое, што калі вочы прыгожыя і знешнасць прывабная, не такая гэта, высвятляецца, і складаная справа – стаць зоркай сучаснага кіно.

Рэжысёр фільма Мэцью Вунь і Клаўдыя Шыфер жанатыя з 2002-га года.

У фільме Чып выконвае ролю Алфі, ката, які належыць аўтарцы шпіёнскіх раманаў Элі (актрыса Брайс Далас Ховард).