Найбуйнейшае ў Еўропе радовішча газу раскансервуюць праз маразы

Чакаецца -6,5 градуса.

Улады Нідэрландаў пастанавілі часова аднавіць здабычу на найбуйнейшым у Еўропе Гронінгенскім газавым радовішчы праз маразы, піша мясцовае выданне NOS. Радовішча закансервавалі 1 кастрычніка 2023 г. праз частыя антрапагенныя землятрусы, звязаных з распрацоўкай радовішча.

Чакаецца, што тэмпература ў краіне ўпадзе ніжэй за 6,5 градуса ніжэй за нуль. Таму Nederlandse Aadolie Maatschappji (NAM) часова адновіць працу вытворчых пляцовак на Шпіцбергене і Шэемдэрцваагу ў Гронінгене.

Паводле словаў дзяржсакратара ў эканамічных пытаннях і клімаце Нідэрландаў Ганса Уайлбрыфа, гэта з'яўляецца захадам стрымання, каб насельніцтва не засталося без газу, калі падчас мінусавых тэмператураў узнікнуць нейкія цяжкасці.

Прыкладам такой праблемы можа стаць выйсце са строю газасховішча Norg праз мінусавую тэмпературу. У гэтым выпадку бяспека газазабеспячэння не можа быць гарантаваная.

Уайлбрыф адзначыў, што на свідравінах на Шпіцбергене і Шэемдэрцваагу зноў адновіцца праца «прыблізна на два дні». З чацвярга тэмпература зноў павысіцца.

«Таму здабыча газу будзе мінімальнай», – падкрэсліў ён у лісце ў Палату прадстаўнікоў.

Дзяржсакратар запэўнівае, што здабыча газу ў Гронінгене будзе канчаткова спыненая 1 кастрычніка 2024 года. У гэты дзень павінны закрыць свідравіны на Шпіцбергене і Шэемдэрсваагу і газазабеспячэнне нават у надзвычайных выпадках з наступнай зімы будзе немагчымым.

Радовішча Гронінген, адкрытае ў 1959 годзе, цягам многіх дзесяцігоддзяў было ключавой крыніцай газу для значнай часткі Заходняй Еўропы. У перыяд росквіту ў 1970-я гады на радовішчы здабывалі 350 млн куб. м газу за дзень, перад закрыццём гэты паказнік скарацілі да 2 млн куб. м.

Яшчэ дзесяць гадоў таму яно давала больш за 50 млрд куб. м газу, але апошнім часам праз пагрозы землятрусаў здабычу на радовішчы абмежавалі на ўзроўні 2,8 млрд куб. м.

Аператар радовішча – кампанія NAM, створаная Shell і Exxon Mobil.