У РФ паводле справы аб тэракце ў «Крокусе» затрымалі яшчэ трох чалавек

Гэта быў іх «Рэно».

Паводле справы аб тэракце ў «Крокус Сіці Холе» ў Падмаскоўі затрымалі яшчэ трох чалавек. Гэта браты Амінчон і Дылавар Ісламавы і іхні бацька Ісраіл, паведамляе ТАСС.

Як паведамляе тэлеграм-канал 112, напярэдадні ўсіх траіх выклікалі на допыт у СК, а потым затрымалі паводле падазрэння ў датычнасці да тэракту.

Цяпер два браты знаходзяцца ў статусе абвінавачаных паводле артыкула аб тэракце, іх бацька – у статусе падазраванага. Усім тром абралі захад стрымання ў выглядзе ўзяцця пад варту да 22 траўня. Як мінімум Амінчон Ісламаў, як сцвярджаецца, у судзе віны не прызнаў.

Дылавар Ісламаў быў апошнім уладальнікам машыны, якую выкарыстоўвалі пры нападзе на «Крокус».

Паводле звестак, якія агучваліся ў судзе, арыштаваныя – нараджэнцы Таджыкістана. Абодва браты працуюць таксістамі. 25-гадовы Дылавар Ісламаў мае расейскае грамадзянства, а 33-гадовы Амінчон Ісламаў – бацька семярых дзяцей ад двух шлюбаў. Іх 62-гадовы бацька жыве ў Цверы на падставе расейскага ВНЖ, афіцыйна нідзе не працуе.

Справы чатырох іншых затрыманых суд разглядаў учора, на паседжанне іх прывезлі пасля брутальных катаванняў.