Politico: Са штаб-кватэры Еўрапола зніклі сакрэтныя дакументы

Са звесткамі кіраўнікоў ведамства.

У Еўраполе расследуюць знікненне канфідэнцыйных звестак вышэйшых службовых асоб ведамства. Выцек інфармацыі справакаваў крызіс у паліцэйскай управе ЕЗ, паведамляе Politico.

Як зазначае выданне, файлы павінны былі быць пад замком, у бяспечнай камеры захоўвання ўнутры штаб-кватэры Еўрапола ў Гаазе.

Згодна з унутраным дакументам ведамства, з якім азнаёмілася Politico, і размовамі з цяперашнімі і былымі супрацоўнікамі, друкаваныя асабовыя справы выканаўчага дырэктара Еўрапола Кэтрын Дэ Бале і іншых высокапастаўленых чыноўнікаў зніклі яшчэ да верасня.

«6 верасня 2023 года дырэктарат Еўрапола паведаміў аб знікненні персанальных дакументаў некалькіх супрацоўнікаў», — адзначылі ў паведамленні.

Пасля праверкі ўсіх запісаў Еўрапол выявіў «дадатковыя адсутныя файлы».

«Улічваючы ролю Еўрапола як праваахоўнага органа, знікненне персанальных спраў супрацоўнікаў з'яўляецца сур'ёзным інцыдэнтам з парушэннем бяспекі і асабовых звестак», — гаворыцца ў запісцы, апублікаванай на ўнутранай сістэме дошкі аб'яў і датаванай 18 верасня.

Выданне паразмаўляла з чатырма дзейнымі і былымі супрацоўнікамі Еўрапола, якім вядомыя дэталі інцыдэнту. З іх слоў, некаторыя са страчаных дакументаў былі знойдзеныя дзякуючы жыхару Гаагі, які знайшоў іх у грамадскім месцы і прынёс у мясцовае аддзяленне паліцыі.

Работнікі расказалі выданню, што персанальныя файлы належалі выканаўчай дырэктарцы Еўрапола Кэтрын Дэ Бале і тром яе намеснікам. Пасля гэтага кіраўніка аддзела кадраў агенцтва адправілі «ў адміністрацыйны адпачынак».

Акрамя гэтага, адзін з чыноўнікаў заявіў, што зніклыя файлы могуць змяшчаць інфармацыю аб заяўцы на працу чыноўніка, адпаведнае навучанне, даты нараджэння, сямейнае становішча, дзяцей, цяперашні адрас і іншую тыповую інфармацыю, якую захоўвае аддзел кадраў.

Еўрапол з'яўляецца адным з найбуйнейшых агенцтваў ЕЗ, якое каардынуе буйныя міжнародныя расследаванні і аперацыі супольна з нацыянальнымі паліцэйскімі органамі і партнёрамі, такімі як Інтэрпол і ФБР ЗША.