СМІ: Вытворчасць гіпергукавой ракеты «Цыркон» каштуе РФ шалёных грошай

Пры гэтым невядома, ці змаглі ўжо запусціць ракету ў серыйную вытворчасць.

Распрацоўка і выпуск гіпергукавой ракеты 3М22 «Цыркон», якой Расея 25 сакавіка ўдарыла па Кіеве, мела патрэбу ў немалой колькасці даследаванняў і выпрабаванняў, накіраваных перш за ўсё на канструяванне праматочнага гіпергукавога рухавіка, які і дазваляе ракеце развіваць хуткасць да ўзроўню гіпергукавой.

Як піша Defense Express, разлічыць дакладны кошт ракеты «Цыркон» амаль немагчыма, бо ўсе звесткі аб яе праектаванні і вытворчасці засакрэчаныя.

За распрацоўку ракеты адказвала расейскае Навукова-вытворчае аб'яднанне машынабудавання, якое ўваходзіць у склад Карпарацыі «Тактычныя ракеты», размешчанае ў Рэуце Маскоўскай вобласці. Работы над ёй пачалі пазней у 2011 годзе, а першыя выпрабаванні прайшлі ў 2015 годзе. У 2020 годзе расейскія чыноўнікі заявілі аб першых поспехах у выпрабаваннях, а ў кастрычніку 2021 года было абвешчана аб паспяховым выпрабаванні ракеты пры запуску з падводнай лодкі.

Калі прымаць да ўвагі аналагічны досвед ЗША ў працы над ракетай Hypersonic Attack Cruise Missile (HACM), якая таксама мела праматочны гіпергукавы рухавік, то толькі на стварэнне гатовага вырабу, без уліку паралельных базавых навуковых прац, Пентагон выдзеліў кампаніі Raytheon 985 млн даляраў у 2022 годзе. І яшчэ 407,6 млн даляраў у студзені 2024 года. Дадатковыя сродкі пайшлі на падрыхтоўку магутнасцей для серыйнай вытворчасці гэтых ракет.

Калі ж прымаць да ўвагі ўсе ацэначныя выдаткі Пентагона ЗША па тэме гіпергукавога ўзбраення, то толькі на адзін 2023 на гэтыя даследаванні і працы было закладзена 4,7 млрд даляраў.

«Кошт за адзінку без уліку выдаткаў на распрацоўку можна параўнаць з коштам эксперыментальных ракет з аналагічнымі праматочнымі гіпергукавымі рухавікамі. Напрыклад, у профільных амерыканскіх выданнях існуюць ацэнкі кошту выпрабавальнай ракеты X-51A Waverider 11-20 млн даляраў за адзінку, пры агульным кошце праграмы 200 млн даляраў, якая складалася з чатырох пускаў», - адзначае Defense Express.

У той жа час выданне паказвае, што, нягледзячы на ўсе выдаткі, «Цыркон» у выніку не выконвае сваю галоўную мэту - абыход супрацьракетнай абароны, бо, як паказаў досвед, можа быць знішчаны найноўшымі супрацьракетнымі комплексамі. Аднак Расея, як мяркуецца, працягне атакі «Цырконам».

Журналісты таксама надумалі параўнаць кошт ракеты «Цыркон» з заяўленай як «гіпергукавая» расейскай ракетай Х-47 «Кінжал», якая насамрэч з'яўляецца цвёрдапаліўнай ракетай, што толькі паскараецца да гіпергукавых хуткасцяў. Дык вось, прыблізны кошт Х-47М2 «Кінжал» складае прыкладна $10 млн. У той жа час ракета з праматочным гіпергукавым рухавіком каштавацьме ў разы больш, калі не на цэлы парадак.

«Агулам можна даволі асцярожна выказаць здагадку, што ў цяперашніх варунках для РФ кошт 3М22 «Цыркон» даволі лёгка можа складаць дзясятак мільёнаў даляраў. А калі ўлічыць кошт распрацоўкі, падзелены на колькасць вырабленых ракет, то можна атрымаць зусім астранамічныя лічбы», - гаворыцца ў матэрыяле.

Таксама цяпер складана ацаніць тэмпы вытворчасці Расеяй ракет «Цыркон», якая, магчыма, яшчэ не запушчаная ў серыйную вытворчасць. Так, вядучы навуковы супрацоўнік Дзяржаўнага музея авіяцыі Валерый Раманенка ў каментары «Суспільному» заяўляў, што ў 2023 годзе Расея планавала вырабіць блізу 20 «Цырконаў», але гэтую праграму выканалі не цалкам.