Амаль 100 чалавек уважаюцца за зніклых без вестак пасля тэракту ў «Крокусе»

На гэты момант вядома аб 140 загінулых.

Супрацоўнікі аператыўных службаў склалі спіс людзей, якія зніклі без вестак пасля тэракту ў «Крокус Сіці Холе». Спіс налічвае 95 чалавек, піша Baza. Звесткі сабралі на аснове зваротаў сваякоў.

У спіс трапілі людзі, з якімі не ўдалося звязацца пасля тэракту, пры гэтым іх няма сярод загінулых і пацярпелых. Паводле інфармацыі тэлеграм-канала ВЧК-ОГПУ, зніклымі без вестак уважаюцца 100 чалавек.

Сваякі такіх людзей звярталіся ў чат «Крокус. Цэнтр дапамогі», створаны ўрадам Маскоўскай вобласці. У блоку «Зверка спісаў» можна было пакінуць звесткі зніклых блізкіх: поўныя імёны, дату нараджэння, месца прапіскі, прыметы знешнасці. Адміністратары выдалялі гэтыя звесткі пасля адпраўкі запыту ў працу.

Адна з карыстальніц чата распавяла ВПС, што знайшла свайго сваяка менавіта так. «Яны выслалі спісы і тэлефон, на які нам паведамілі, у якім шпіталі знаходзіцца пацярпелая», – удакладніла яна. Аднак да вечара 26 сакавіка блок «Зверка спісаў» закрылі. Адміністратары патлумачылі гэта тым, што ў чат уступіла «вялікая колькасць правакатараў». Пры гэтым людзі, якія шукаюць зніклых блізкіх, усё яшчэ могуць звярнуцца ў чат-бот. Таксама можна патэлефанаваць на тэлефон гарачай лініі МНС і прыехаць на апазнанне.

На гэты момант вядома аб 140 загінулых - 27 сакавіка яшчэ адзін чалавек памёр у лякарні. У вельмі цяжкім стане знаходзяцца чацвёра, паведаміў кіраўнік Міністэрства аховы здароўя РФ Міхаіл Мурашка. У спісе загінулых, размешчаным МНС, на 20.00 26 сакавіка значацца 120 чалавек. Колькасць пацярпелых дасягнула 360, сярод іх 11 дзяцей.

На нарадзе з прэзідэнтам Расеі Уладзімірам Пуціным 25 сакавіка кіраўнік Следчага камітэта Аляксандр Бастрыкін казаў, што ў выніку тэракту ад агнястрэльных раненняў загінула 40 чалавек, ад спалучэння агнястрэльных і колата-рэзаных ранаў — два чалавекі, яшчэ 45 памерлі праз пажар, ад уздзеяння высокай тэмпературы і ад прадуктаў гарэння.

Усяго ў лякарні паступілі 145 чалавек, паведаміла тады ж віцэ-прэм'ерка Таццяна Голікава. На гэты момант на лячэнні застаюцца 80, у тым ліку шасцёра дзяцей.

26 сакавіка МНС паведаміла аб заканчэнні разбору завалаў і мерапрыемстваў па выратаванні і пошуку пацярпелых у «Крокус Сіці Холе».

Увечары 22 сакавіка ў «Крокус Сіці Хол» уварваліся невядомыя і адкрылі страляніну з аўтаматаў па бяззбройных людзях, якія прыйшлі на канцэрт гурта «Пікнік», а затым учынілі пажар. Паводле звестак СКР, нападнікі правялі ў будынку 13 хвілін, а затым схаваліся на аўтамабілі. Пазней ФСБ заявіла, што затрымала 11 чалавек, у тым ліку чатырох непасрэдных выканаўцаў.

У выніку пажару дах глядзельнай залы «Крокус Сіці Хол» цалкам абрынуўся. Усяго падчас тэракту ў будынку маглі знаходзіцца да 6200 чалавек - менавіта столькі месціць пляцоўка. На сайце «Пікніка» гаварылася, што на канцэрт былі прададзеныя ўсе квіткі.