Forbes: Украіна вядзе бой з Расеяй за кінутыя танкі Strv 122

Гаворка ідзе пра швэдскія аналагі Leopard 2, страчаныя ў баях пад Крамянной.

21-я брыгада УСУ страціла 7 з 10 танкаў Strv 122 у баях пад сялом Тэрны, але за «знішчаны» аналітыкі ўважаюць толькі адзін танк. Астатнія цяпер спрабуюць адцягнуць з шэрай зоны як УСУ, так і расейскія сілы. Пра гэта піша ў сваёй публікацыі Forbes.

У Данецкай вобласці, на ўсход ад вёскі Тэрны, ёсць адрэзак палёў і лясных масіваў, плошчай блізу шасці кіламетраў, дзе 21 механізаваная брыгада УСУ і іншыя падраздзяленні стрымліваюць расейскія наступы.

21-я – гэта так званая «швэдская брыгада» УСУ. У яе складзе знаходзіцца бронятэхніка швэдскай вытворчасці. Паводле звестак аналітыкаў, сама меней сем з дзесяці швэдскіх танкаў Strv 122, якія знаходзіліся на ўзбраенні брыгады, ужо страчаныя. Асноўную частку з гэтых Strv 122 кінулі на адрэзку плошчай тры квадратныя кіламетры недалёка ад Тэрнаў.

Аднак аналітыкі аўтарытэтнага партала Oryx знішчаным назвалі толькі адзін з сямі Strv 122. Астатнія танкісты пакінулі на полі бою пасля эвакуацыі экіпажаў.

Шэсць Strv 122 засталіся ў полі, і цяпер інжынеры абодвух бакоў канкуруюць адзін з адным за тое, хто хутчэй забярэ танкі сабе. УСУ хочуць іх эвакуяваць, каб выправіць іх у Літву для рамонту. Расейцы, магчыма, плануюць прадэманстраваць як трафей.

У цяперашні час УСУ перамагаюць у гэтай гонцы. Паводле звестак са спадарожнікавых здымкаў, тры танкі на гэты момант ужо былі адбуксаваныя Сіламі абароны. Адзін з даступных да гэтага часу Strv 122 знаходзіцца ўздоўж дарогі з Тэрнаў.

Аднак адзін танк ужо амаль сапраўды страчаны. Гаворка пра машыну, якую пара расейскіх інжынерных машынаў паспрабавала адбуксаваць 19 сакавіка, праз некалькі дзён пасля нападу расейскім FPV-дронам.

Дзве расейскія эвакуацыйныя БРЭМ, злучаныя адна з адной, паднялі Strv 122 лябёдкай і пачалі цягнуць да расейскіх пазіцый. Яны прайшлі паўшляху, дзе іх сустрэлі ўкраінскія дроны. Адна з машынаў была знішчаная, а адну расейцы пазней эвакуявалі. Пры гэтым, паводле звестак аналітыка Andrew Perpetua, сам Strv 122 усё яшчэ знаходзіцца на месцы.