Хлусня Герасімава загнала армію РФ у смяротную пастку

Кожны новы даклад усё больш аддаляецца ад рэчаіснасці.

Міжнародныя СМІ іранізуюць над расійскай арміяй, каментуючы камічную тактыку публікацыі ШІ-фэйкаў пра поспехі з фронту. The Financial Times распавяла заходняй аўдыторыі, як камандзіры Узброеных Сіл РФ выкарыстоўваюць дыпфэйк-відэа, каб прыпісваць сабе захоп гарадоў, якія яны не ўзялі.

Хлусня пра «захоп» па ланцужку камандзіраў ідзе на самы верх да Пуціна, які ўражваецца неіснуючымі ў рэчаіснасці перамогамі.

У сярэдзіне кастрычніка ваеначальнікі далажылі Уладзіміру Пуціну пра ўзяцце Добрапілля, а Мінабароны апублікавала ролік з расійскімі сцягамі над руінамі горада, але як мінімум адзін эпізод, паводле ацэнкі аналітыкаў, згенераваны ШІ. Праз амаль тры тыдні пасля дакладу ўкраінскія войскі па-ранейшаму ўтрымліваюць пазіцыі ў Добрапіллі.

Паводле даных FT, хлусня пранізвае ўсю вертыкаль арміі, а з «нейроннага ўзняцця сцяга» ўжо смяюцца і расійскія праваенныя блогеры. У нарэзцы кадраў з дронаў салдаты трымаюць расійскія сцягі сярод руін нібыта захопленага горада.

«Арыентацыя сцяга на відэа рэзка змяняецца, нібы яго раптам прымацавалі да флагштока за супрацьлеглы край… Такі збой немагчыма патлумачыць сцісканнем або артэфактамі датчыка камеры. Без сумневу, гэты фрагмент быў падроблены», — заявіў кіраўнік Conflict Intelligence Team Руслан Левіеў.

Гэта не адзінкавы выпадак. ISW знайшоў 35 ролікаў расійскіх падраздзяленняў і ваенкораў, якія, верагодна, створаныя або адрэдагаваныя з дапамогай ШІ. Ва многіх — грубыя ляпы: салдаты з непраўдападобнымі прапорцыямі цела, людзі і сцягі, што раптоўна знікаюць у лісці. Практыка атрымала назву «сцягавтык», а праваенныя блогеры называюць такія відэа «нейронным узняццем сцяга».

Крыніца FT, знаёмая з Пуціным, апісала, як хлусня падымаецца па вертыкалі да самага верху: «Калі нехта паведамляе, што захапіў населены пункт, ён хваліцца гэтым перад палкоўнікам, той — перад генералам, генерал — перад генерал-лейтэнантам, які, у сваю чаргу, хваліцца перад Генеральным штабам, а той — перад Вярхоўным галоўнакамандуючым. Да таго моманту, калі яны заканчваюць дакладваць, яны ўжо адступілі».

«Потым прыходзяць загады, якія зыходзяць з таго, што мы ўтрымліваем гэтую пазіцыю і спрабуем захапіць наступную, хоць нас там ужо няма. Менавіта з-за гэтага ўзнікае велізарная колькасць страт з абодвух бакоў… Вось чаму Сталін загадваў расстрэльваць людзей за такое», — дадаў суразмоўца выдання.

Падраздзяленні пад ціскам няўдач, лічаць аналітыкі, выкарыстоўваюць фэйкавыя ролікі, каб адрапартаваць пра выкананне крэмлёўскіх тэрмінаў або падмацаваць перабольшаныя даклады. Такія відэа, паводле іх ацэнкі, маглі ўсяліць у самога Пуціна беспадстаўную ўпэўненасць у прасоўванні арміі.

Разрыў паміж дакладамі і рэчаіснасцю велізарны.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com