На Філіпінах прачнуўся вулкан

Людзей выратоўваюць ад лавы.

З-за магутнага вывяржэння вулкана Майон улады Філіпін былі вымушаныя тэрмінова эвакуаваць тысячы людзей. Над сталіцай краіны абмежавалі палёты грамадзянскай авіяцыі, піша The Independent.

У нядзелю спецыялісты зафіксавалі выкіды лавы і землятрусы. Улады заклікалі людзей неадкладна пакінуць шасцікіламетровую зону рызыкі вакол гары, дзе высокая верагоднасць сходу апоўзняў. У бяспечныя цэнтры ўжо перавезлі каля паўтары тысячы сем'яў, для іх падрыхтавалі 300 тысяч камплектаў з прадуктамі і рэчамі першай неабходнасці.

Некалькі гарадоў у цэнтральнай правінцыі Албай накрыла густым слоем попелу. Гэта сур'ёзна парушыла дарожны рух і звыклы рытм жыцця мясцовых жыхароў. Упраўленне грамадзянскай авіяцыі выпусціла папярэджанне аб абмежаванні палётаў над Манілай: вулканічны попел і часціцы ў паветры могуць пашкодзіць навігацыйныя сістэмы і рухавікі самалётаў, што стварае пагрозу бяспецы пасажыраў.

Цяпер у рэгіёне дзейнічае трэці ўзровень небяспекі з пяці магчымых.

Філіпіны размешчаныя ў межах Ціхаакіянскага «Агнявога кальца» — зоны, якая характарызуецца частымі землятрусамі і вывяржэннямі. І Майон лічыцца самым няспакойным з 22 вулканаў краіны. За апошнія чатыры стагоддзі ён прачынаўся каля 50 разоў. Яго папярэдняя актыўнасць была зафіксавана летам 2023 года, а найбольш смертаноснае вывяржэнне адбылося ў лютым 1841-га. Тады патокі лавы цалкам знішчылі адзін з гарадоў, загінулі 1200 чалавек.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com