Беларускі рубель можа моцна патаннець у маі

Незвычайная тэндэнцыя.

Асаблівасцю мінулага тыдня стала зніжэнне курсу беларускага рубля адначасова да долара і да расійскага рубля. Не выключана, што ў маі наш рубель працягне зніжацца да долара — і ўсё праз расійскага «брата».

З 27 красавіка па 4 мая 2026 года адбыліся такія змяненні курсаў замежных валют і валютнага кошыка да беларускага рубля:

Кошт валютнага кошыка павялічыўся на 0,4 % і склаў Br 0,175;

Долар ЗША павысіўся ў адносінах да беларускай валюты на 0,27 % і склаў Br 2,8267;

Курс еўра нязначна ўзмацніўся ў адносінах да рубля (+0,11 %) і склаў Br 3,3061;

Курс расійскага рубля таксама вырас (+0,53 %) і склаў Br 3,7737 за 100 расійскіх рублёў;

Кітайскі юань амаль не змяніўся і склаў Br 4,1384 за 10 юаняў.

У першы тыдзень мая магчыма захаванне валацільнасці курсу беларускага рубля. На працягу 4–11 мая курс беларускага рубля да долара можа вагацца ў дыяпазоне 2,81–2,85.

Незвычайная тэндэнцыя расійскага рубля і долара

Сітуацыя на беларускім валютным рынку адрознівалася ад папярэдніх тыдняў. Калі 28 красавіка зніжэнне долара ў адносінах да беларускай валюты традыцыйна суправаджалася ўмацаваннем расійскага рубля ў адносінах да беларускага, то на наступны дзень сітуацыя змянілася. З 29 красавіка па 4 мая даражэлі і долар, і расійскі рубель.

Раней зніжэнне беларускага рубля да расійскага звычайна суправаджалася ўмацаваннем да долара або наадварот. Апошнія змены напрыканцы красавіка — пачатку мая могуць сведчыць пра ўплыў унутраных фактараў, такіх як скарачэнне прапановы валюты праз, напрыклад, пагаршэнне сітуацыі ў знешнім гандлі. Аднак больш верагодна, што гэта была рэакцыя беларускага рубля на мацнеючы расійскі рубель і падрослы на знешніх рынках долар. Магчыма таксама ўздзеянне адразу дзвюх прычын.

Калі пра ўплыў унутраных фактараў можна будзе казаць, прасачыўшы больш працяглую дынаміку курсу беларускага рубля і прааналізаваўшы статыстыку за красавік, то прычыны ўмацавання расійскага рубля і ў адносінах да замежных валют, у тым ліку і да беларускага рубля, відавочныя.

Беларускаму рублю суджана ўпасці?

Расійскі рубель мацнеў на фоне дарагой нафты. Кошт нафты маркі Brent на канец красавіка перавышаў $ 100 за барэль. Расійская сыравіна традыцыйна прадаецца з дысконтам. Аднак на фоне сусветнага дэфіцыту нафты расійскае «чорнае золата» або гандлявалася з невялікім дысконтам у $ 10, або нават з прэміяй.

Сітуацыя ў маі для расійскага рубля можа змяніцца. Вялікая верагоднасць, што рубель ад росту перайдзе да зніжэння. На гэта будзе ўплываць выхад Аб’яднаных Арабскіх Эміратаў з АПЕК і АПЕК+. У выніку краіна з мая — чэрвеня перастане прытрымлівацца ўстаноўленых картэлем і альянсам квот, што можа знізіць нафтавыя цэны на сусветным рынку. Акрамя таго, ЗША могуць не падоўжыць мараторый на санкцыі ў дачыненні да расійскай нафты.

Нарэшце, Мінфін Расіі разглядае магчымасць аднаўлення ў маі дзеяння бюджэтнага правіла, што павысіць попыт на замежную валюту на расійскім валютным рынку. Услед за расійскім рублём зніжацца да долара будзе і беларускі рубель.

Што да долара, то апошні тыдзень ён быў вельмі валацільны. Калі яшчэ 28 красавіка індэкс DXY вагаўся ў дыяпазоне 98,5, дык ужо 30 красавіка яго велічыня дасягала 99. Умацаванне амерыканскай валюты на сусветным рынку пры адначасовым росце расійскага рубля якраз і магло справакаваць сітуацыю зніжэння курсу беларускага рубля адначасова да абедзвюх замежных валют.

Анастасія Лузгіна, «Белсат»

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com