«20 хвілін разборак»

У мінскім кінатэатры ўчынілі скандал з-за адмовы пусціць малога на фільм 16+.

У Threads абмяркоўваюць пару з Мінска, якая прыйшла з маленькім дзіцем на трохгадзінны паказ фільма «Адысэя» з узроставым абмежаваннем 16+. Супрацоўніца кінатэатра адмовілася прапускаць сям’ю, аднак пасля працяглай спрэчкі і ўмяшання адміністратара бацькі ўсё ж трапілі ў залу разам з малым.

Інцыдэнт адбыўся ў адным з мінскіх кінатэатраў Mooon, дзе паказвалі «Адысэю» Крыстафера Налана, піша «Зеркало».

«На фільм „Адысэя“ не пускалі пару з дзіцем. Тлумачылі, што існуюць узроставыя абмежаванні 18+ (насамрэч рэйтынг фільма — 16+. — Заўв. рэд.). Бацька дзіцяці жорстка „наехаў“ на дзяўчыну, якая стаяла на кантролі ў залу. Прыйшоў адміністратар і прапусціў. 20 хвілін разборак», — расказала карыстальніца Threads.

Пры гэтым, паводле яе слоў, іншаму мужчыну, які прыйшоў на той самы сеанс з дзесяцігадовым сынам, прайсці не дазволілі.

Большасць каментатараў раскрытыкавала як бацькоў, так і адміністратара кінатэатра, які прапусціў на сеанс дзіця. Людзі адзначалі, што гэта можа быць шкодна для самога малога, а некаторыя прапаноўвалі ў такіх выпадках тэлефанаваць у міліцыю:

«Дзяўчыне, якая не пустіла, — прэмію. Адміністратара, які прапусціў, — пазбавіць прэміі і таксама аддаць яе дзяўчыне. Закон ёсць закон. А не так, што я прыйду, паскандалю — і мне цяпер можна ўсё. Гэта не тая сітуацыя, дзе можна паступіцца правіламі».

«Тут пытанні не толькі да работнікаў, але і да бацькоў… Цягнуць такое дзіця на фільм у тры гадзіны — гэта ж трэба дадумацца…»

«Калі ў адрас дзяўчыны былі абразы або пагрозы, трэба выклікаць міліцыю. У гандлёвым цэнтры яны праз тры хвіліны будуць на месцы».

«Яшчэ пытанне, наколькі гэты глядач быў карэктны з супрацоўніцай кінатэатра. Калі „наехаў“, то гэта ўвогуле „адміністратыўка“. А наогул сітуацыя вельмі гендарна паказальная: з дзяўчынай не выйшла, адміністратар-мужчына ўсё вырашыў (пайшоў насустрач мужчыне). Фу! Вельмі дрэнна».

«Паход з немаўлём у звычайны кінатэатр катэгарычна не рэкамендуецца, бо гэта можа нанесці сур’ёзную шкоду фізічнаму і псіхічнаму здароўю дзіцяці. Асноўныя фактары рызыкі. Пашкоджанне слыху: узровень гуку ў кінатэатрах часта перавышае 85–100 дБ. У немаўлятаў слыхавыя праходы вузейшыя і больш адчувальныя, чым у дарослых. Такі шум можа выклікаць незваротную траўму органаў слыху. Зрокавая перагрузка: экран занадта вялікі, яркі і мігаючы».

«Я супраць пазіцыі „чаму я павінен знаходзіцца побач з крычлівым дзіцем“ як такой, бо яе прымяняюць і да паркаў, і да кавярняў, і да грамадскага транспарту. Але менавіта ў гэтай сітуацыі ніяк не выходзіць быць на баку бацькоў, таму што кінатэатр у першую чаргу шкодны самому дзіцяці, там вельмі шумна».

«Там такі гучны гук, што шкада, не было берушы пры сабе. Я скруціла сурвэткі і засунула ў вушы, каб не аглухнуць. Бацькі, якія цягнуць дзіця на фільм, а адміністратар, які пускае, заслугоўваюць як мінімум асветніцкай гутаркі. Правілы +18 проста існуюць».

«Мы таксама нядаўна хацелі схадзіць з нашым двухгадовым дзіцем на мультфільм. Але ўбачылі ўзроставыя абмежаванні 14+ і адразу перадумалі. Думаю, такія абмежаванні ставяць не проста так. Да таго ж у такім узросце самому дзіцяці цяжка спакойна праседзець амаль дзве гадзіны ў кінатэатры».

Праўда, некаторыя паставіліся да сітуацыі менш катэгарычна:

«Пытанне з узроставымі абмежаваннямі неадназначнае: цягнуць маленькае дзіця не на мульцік — не нармальна. Але!!! Просты прыклад — „Чалавек-павук“. 16+?! Што??? Мы ўсе глядзелі яго з дзяцінства».

«Што вы ўсе такія злыя?! Але галоўнае, каб не рэў увесь фільм. Шкада, вядома, калі няма бабуль і дзядуляў, на каго можна часова пакінуць дзіця…»

«Хіба ў прысутнасці законных прадстаўнікоў на маркіроўку не закрываюць вочы? Калі бацькі прынялі рашэнне, што гэты матэрыял не акажа згубнага ўплыву на дзіця».

У каментарыях да паста з’явіўся адказ кінатэатра Mooon. Там пацвердзілі, што ўзроставыя абмежаванні павінны выконвацца для ўсіх наведвальнікаў, і паабяцалі разабрацца ў сітуацыі.

«Вы маеце рацыю: калі для фільма ўсталяваны рэйтынг 16+, гледачы маладзейшыя за 16 гадоў не могуць быць дапушчаныя ў залу. Гэтае правіла павінна выконвацца для ўсіх гасцей. Мы не будзем каментаваць дэталі па канкрэтных гасцях у публічным полі, але абавязкова праверым сітуацыю з камандай: чаму ўзнікла такая працяглая разборка ля ўваходу ў залу і на якой падставе было прынята рашэнне аб допуску.

Дзякуй, што звярнулі на гэта ўвагу. Такія сітуацыі не павінны вырашацца „па настроі“: правілы адзіныя для ўсіх», — заявілі ў кінатэатры.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com