Каго могуць вызваліць ад поўнай аплаты ЖКП паводле «дармаедскага» дэкрэту

Сітуацыі можна ўмоўна падзяліць на чатыры блокі.

Мінпрацы сфармавала прыкладны пералік цяжкіх жыццёвых сітуацый, паводле якіх тых, хто трапіў пад дэкрэт спрыяння занятасці насельніцтву, цалкам або часткова вызваляць ад аплаты ЖКП паводле эканамічна абгрунтаваных тарыфаў. Спіс быў накіраваны ў аблвыканкамы і камісіі. Сітуацыі можна ўмоўна падзяліць на чатыры блокі, піша газета «Звязда».

Першы блок – стан здароўя. Напрыклад, наяўнасць у чалавека захворвання, якое з'яўляецца паказаннем да ўстанаўлення інваліднасці, але яна з нейкіх прычынаў пакуль не аформленая, доўгае аднаўленне пасля траўмы, праходжанне курса лячэння і рэабілітацыі ад нарказалежнасці.

Другі блок – неабходнасць догляду за дзецьмі, старэйшымі за сем гадоў. Напрыклад, школьнік стаіць на дыспансерным уліку з хранічным захворваннем, навучаецца дома пасля хваробы. Трэці блок – неабходнасць сталага або часовага догляду за дарослымі непрацаздольнымі грамадзянамі. Чацвёрты – адсутнасць магчымасці працаўладкавання. Тут могуць быць такія аб'ектыўныя прычыны, як значная аддаленасць месца жыхарства ад органаў тэрытарыяльнай службы занятасці, нерэгулярная транспартная сувязь, адсутнасць вакансій паводле спецыяльнасці.

– Хачу адразу сказаць, што гэты пералік прыкладны, ён не закрыты. У камісіі застаецца права прымаць пастанову ў кожнай канкрэтнай сітуацыі, – адзначае кіраўнік управы палітыкі занятасці Мінпрацы Алег Токун.

Каб атрымаць «вызваленне» ад поўнай выплаты ЖКП, трэба будзе звярнуцца ў сталыя дзейныя камісіі паводле каардынацыі працы ў спрыянні занятасці насельніцтва.

Тыя, хто падпадае пад дэкрэт «Аб спрыянні занятасці насельніцтва», гарачае водазабеспячэнне пачнуць аплачваць паводле поўных тарыфаў з 1 студзеня 2019 года, газазабеспячэнне пры наяўнасці індывідуальных газавых ацяпляльных прыбораў і цеплазабеспячэнне – з 1 кастрычніка 2019 года.

Нагадаем, 25 студзеня Лукашэнка падпісаў дэкрэт № 1, якім прадугледжаныя захады ў спрыянні занятасці насельніцтва. У новы дэкрэт не ўвайшлі нормы пра збіранне з працаздольных непрацоўных грамадзянаў збору на фiнансаванне дзяржаўных выдаткаў.

На месцах будуць створаныя спецыяльныя камісіі, якія будуць збіраць інфармацыю пра «дармаедаў».

Працаздольныя грамадзяне, не занятыя ў эканоміцы, будуць аплачваць паводле коштаў (тарыфаў), якія забяспечваюць 100% пакрыццё выдаткаў, наступныя камунальныя паслугі:

гарачае водазабеспячэнне, газазабеспячэнне пры наяўнасці індывідуальных газавых ацяпляльных прыбораў, цеплазабеспячэнне.

Пастанова пачынае дзеянне з 1 студзеня 2019 года.

Нагадаем, што папярэдняя версія дэкрэта выклікала масавыя пратэсты сярод насельніцтва.