Незаконныя службоўскія катэджы будуць знасіць бульдозерамі

Камітэт дзяржаўнага кантролю Менскай вобласці праверыў, як выконваецца даручэнне Аляксандра Лукашэнкі па навядзенні парадку ў водаахоўных зонах і ўзбярэжных палосах. Вынік маласуцяшальны: з 1,5 тысяч усталяваных парушэнняў ліквідаваная толькі траціна. Некаторыя зрухі азначыліся ў Пухавіцкім і Крупскім раёнах. «Чаму бяздзейнічаюць астатнія? Чым растлумачыць папушчальніцтва самазахопу і пазапраўнае карыстанне зямлёй? На чарговай нарадзе, прысвечанай вынікам праверкі, пытанні ставіліся гранічна жорстка. Сітуацыя міндальнічаць не дазваляе», – піша сёння газета «Советская Белоруссия».

– На словах – адно, а на справе – іншае, – такую выснову старшыня дзяржкантролю Менскай вобласці Уладзіслаў Цыдзік зрабіў пасля двухдзённага рэйду, у якім асабіста браў удзел. – У які раз абмяркоўваем пытанне, а «новыя гаспадары» зямлі так і працягваюць панаваць на пазапраўна захопленых угоддзях. «Акупаваныя» гектары лесу. Ад грыбнікоў і ягаднікаў «прыватныя» валоданні ахоўваюць аўчаркі. Чаго гэта вартае?

Пералік парушэнняў, названых Уладзіславам Цыдзікам, апынуўся вялікім. Але ж прынятае пэўнае рашэнне: пазапраўна пабудаваныя будынкі знесці, захопленую зямлю вярнуць! Але як стаялі ў маляўнічых ахоўных зонах асабістыя басейны, лазні і тэнісныя корты, так і стаяць непарушна. Чым растлумачыць такую недатыкальнасць?

Прычын таму прадстаўнікі мясцовых улад прыводзілі шмат, у тым ліку гучала пытанне: «За чый рахунак знасіць?» Дзіўная разгубленасць, – адзначае «Советская Белоруссия». Алгарытм вядомы: за рахунак парушальнікаў. А за тых, хто не зробіць ласку і не вызваліць мясцовасць ад сваіх архітэктурных вынаходстваў добраахвотна, гэта павінны будуць зрабіць улады.

— У вашым распараджэнні тэхніка лясгасаў, МНС, вось і дзейнічайце – прылады для аднаўлення законнасці ў мясцовых выканкамаў ёсць, – лічыць Уладзіслаў Цыдзік. — Выязджайце на аб'екты, прафесійна разбірайцеся. Ініцыюйце кірунак матэрыялаў у пракуратуру, суды, органы ўнутраных спраў, падатковыя службы.

Бессэнсоўна ўпрыгожваць рэчаіснасць, займацца фальсіфікацыяй, папярэдзіў старшыня абласнога дзяржкантролю. Дзяржаўныя кантралёры асабіста ўсё правераць. Скажам, ліквідацыя недахопаў пад Менскам, судзячы па дакладах «наверх», ідзе поўным ходам. У рэчаіснасці – млява. У Ждановічах–1, напрыклад, не знесены каменны плот, які нявечыць мясцовасць . Маўляў, няма ўласніка. Што рабіць? Звяртацца ў міліцыю і аб'яўляць гаспадара ў вышук...

Як піша «Советская Белоруссия», неўзабаве будзе праведзеная рэвізія ўсіх раней прынятых рашэнняў аб зямлі. Вялікі, што і казаць, пласт працы. Большасць угоддзяў разбазарвалася ў 1990-я гады – пачатку 2000–х. Але нягледзячы на гэта, вінаватыя ў махінацыях службовыя асобы — і гэта прынцыповая пазіцыя — павінны быць прыцягнутыя да адказнасці, аж да крымінальнай. Урэшце, за шматлікімі фактамі пазапраўнага захопу зямлі крыюцца карупцыйныя злачынствы. У гэтым годзе ў Менскай вобласці ўзбуджаныя ўжо 16 крымінальных спраў, звязаных з парушэннямі зямельнага заканадаўства. І часцей за іншыя ў следчых матэрыялах фігуруе Менскі раён.

Пачатая маштабная праверка з Менскага раёна. Апрацаваныя ўжо 550 дэкларацый і па 11 з іх у падаткавікоў узніклі пытанні. Звесткі аб сумнеўных дэкларантах перададзеныя ў адпаведныя службы, паведамляе «Советская Белоруссия».