Мінюсту давядзецца вывучыць беларускую мову

Вярхоўны суд Беларусі 23 кастрычніка абавязаў Міністэрства юстыцыі падаць дакументы па справе грамадскага праваабарончага аб'яднання "Вясна" на беларускай мове.

Высоўваючы хадайніцтва аб падаванні такіх дакументаў, адзін з заснавальнікаў "Вясны" Алесь Бяляцкі заявіў, што "не валодае ў дастатковай меры расейскай мовай". "Мы падавалі дакументы на рэгістрацыю руху на беларускай мове, аднак адказ атрымалі на расейскай. Мы лічым гэта абразлівым стаўленнем да беларускай мовы і да нас як яго носьбітаў. Мала таго, што Мінюст адмовіў нам у праве на асацыяцыю, так хоча адмовіць нам і ў праве на карыстанне роднай мовай", – адзначыў праваабаронца.

Пасля пяціхвіліннага перапынку суддзя Вярхоўнага суду задаволіла хадайніцтва заснавальнікаў "Вясны". Яна абавязала Мінюст да вечара 23 кастрычніка перавесці рашэнне аб адмове ў рэгістрацыі "Вясны", а таксама пярэчанне па скарзе яе заснавальнікаў на беларускую мову.

Акрамя гэтага, Вярхоўны суд задаволіў хадайніцтва аб вядзенні пасяджэння на беларускай мове. Наступнае пасяджэнне прызначанае на 25 кастрычніка – паведамляе БелаПАН.

Нагадаем, дакументы на рэгістрацыю грамадскага праваабарончага аб'яднання "Вясна" былі перададзеныя ў Мінюст 23 ліпеня. 23 жніўня міністэрства адмовіла ў рэгістрацыі аб'яднання, матываваўшы сваё рашэнне тым, што назва ствараемай арганізацыі аналагічная назве раней ліквідаванага грамадскага аб'яднання, статут аб'яднання прадугледжвае магчымасць дзейнічаць у дасягненні не адзначаных у ім мэт, а заснавальнікі прыцягваліся да адміністрацыйнай адказнасці за здзяйсненне розных правапарушэнняў.