Палітвязьню Артуру Фінькевічу пагражае тры гады калоніі

Амаль месяц знаходзіцца ў магілёўскім сьледчым ізалятары моладзевы актывіст Артур Фінькевіч, на якога завялі яшчэ адну крымінальную справу. “Расьсьледаваньне справы завяршылася, Артур зь ёй азнаёміўся, цяпер справу перадалі ў пракуратуру і праз колькі дзён перададуць у суд”, — паведаміла «Радыё Свабода» адвакат Фінькевіча Ганна Рыбалка.

Сьледчы Аляксандар Ліскавец, які вёў справу Артура Фінькевіча, ад камэнтару ўстрымаўся.

Нагадаем, Артура Фінькевіча, які адбываў “хімію” ў Магілёўскай спэцкамэндатуры, затрымалі 26 кастрычніка. Актывіста абвінавацілі ў парушэньні рэжыму адбыцьця пакараньня. Максымальнае пакараньне, якое пагражае хлопцу, — тры гады калёніі.

У якіх умовах трымаюць вязьня? Паводле актывісткі Касі Галіцкай, на ўмовы Артур Фінькевіч ня скардзіцца. Ён па-ранейшаму знаходзіцца ў камэры, дзе разам зь ім шэсьць чалавек, харчаваньне нармальнае, атрымлівае карэспандэнцыю.

Актывіст паведаміў свой адрас, на які прапануе дасылаць яму лісты:

“Лісты яму можна пісаць, лісты ён атрымлівае. І нават, наколькі мне вядома, яму можна дасылаць невялічкія бандэролі. Ягоны адрас такі: Магілёў, вуліца Крупскай 99-а, сьледчая турма №4”, -- паведаміла Кася Галіцкая.

Першае пакараньне, два гады “хіміі”, Артур Фінькевіч атрымаў за графіці палітычнага зьместу – “Дастал” і “Мы хочам новага!”.

На “хіміі” Артуру Фінькевічу заставалася адбыць паўтара месяца. Яго некалькі разоў каралі нібыта за парушэньне рэжыму. Зь некаторымі пакараньнямі актывіст быў ня згодны, але аспрэчыць іх не ўдалося.