У Інгушэціі пачаліся маштабныя баявыя дзеянні

У ноч на панядзелак у інгушскім Малгабеку невядомыя з гранатамётаў абстралялі прыватны дом, які належыў супрацоўніку АУС горада, паведамляе РИА «Новости» са спасылкай на крыніцу ў праваахоўных органах рэспублікі.

Па дадзеных крыніцы, абстрэл дома, які належыў супрацоўніку Малгабецкага ГАУС Мусе Цачоеву, пачаўся каля 01:50 па маскоўскім часе. Тыя, хто нападаў, выкарыстоўвалі аўтаматычную зброю і падствольныя гранатамёты. Па папярэдніх дадзеных, пацярпелых няма. На месца здарэння выехала следча-аператыўная група.

Некалькі пазней, у 2:30 у паселішчы Пседах Малгабецкага раёна з гранатамёта і аўтаматычнай зброі быў абстраляны прыватны дом, у якім жыве начальнік Малгабецкага аддзялення УФСБ РФ па Рэспубліцы Інгушэція Амур Картоеў, паведамляе ІТАР-ТАСС са спасылкай на МУС рэспублікі. У выніку абстрэлу таксама ніхто не пацярпеў.

У нядзелю ў раёне населенага пункта Яндарэ ў Назранаўскім раёне са снайперскай вінтоўкі быў абстраляны блокпост. Абстрэл пачаўся каля 22:15 і працягваўся не менш за 10 хвілін. Пацярпелых, як паведаміў суразмоўца агенцтва, таксама няма.

Як паведамляе апазіцыйны сайт "Інгушэція.Org", у рэдакцыю паступаюць шматлікія тэлефанаванні з розных населеных пунктаў рэспублікі, якія паведамляюць аб выбухах і абстрэлах. Дайшлі паведамленні аб выбухах у цэнтры і Завадскім раёне Назрані, у раёне дыслакацыі вайсковай часткі ў сяле Алхасты Сунжанскага раёна і на базе АМАП у Карабулаке. Перастрэлкі меркавана адбыліся ў сяле Сагопшы Малгабецкага раёна, у станіцах Троіцкая і Арджанікідзаўская.

Як сцвярджае інтэрнэт-выданне, "з наступленнем цемры ўся тэрыторыя рэспублікі перайшла пад кантроль невядомых вайсковых фармірааванняў". Выданне паведамляе аб маштабных баявых дзеяннях у рэспубліцы. Афіцыйнага пацверджання шматлікіх паведамленняў аб выбухах і перастрэлках у Інгушэціі ў ноч на панядзелак не паступала.