Кошт бензіну ў ЗША знізіўся да мінімуму -- 47,8 цэнта за літр

Бензін у ЗША працягвае таннець. Па стане на 1 снежня сярэдні за тыдзень рознічны кошт аўтамабільнага бензіну катэгорыі Regular (актанавы індэкс 85-88) склаў 1,811 дал./галон (прыкладна 47,8 цэнта/літр).

Як вынікае з афіцыйнай статыстыкі Міністэрства энергетыкі ЗША, гэта самы нізкі паказчык з 10 студзеня 2005г.

Ніжэй за адзнаку 2 дал./галон сярэдні за тыдзень рознічны кошт бензіну ў ЗША захоўваецца ўжо два тыдні, а апошні раз ніжэй за гэтую адзнаку ён быў толькі ў пачатку сакавіка 2005г. За мінулы тыдзень галон бензіну катэгорыі Regular на АЗС у ЗША у сярэднім стаў танней яшчэ на 8,1 цэнта, а адносна аналагічнага перыяду папярэдняга года яго сярэдні за тыдзень рознічны кошт па стане на 1 снежня гэтага года знізіўся на 1,250 дал.

У геаграфічных рэгіёнах ЗША самы нізкі кошт бензіну па стане на 1 снежня быў зарэгістраваны на Сярэднім Захадзе - 1,717 дал./галон. Тым часам самы дарагі бензін быў на Заходнім узбярэжжы - 1,972 дал./галон.

Па асобна ўзятых штатах самы нізкі па стане на 1 снежня рознічны кошт бензіну быў у штаце Тэхас - 1,713 дал./галон, а яго самы высокі за тыдзень кошт застаўся ў штаце Нью-Ёрк - 2,136 дал./галон.

Па асобна ўзятых буйных гарадах ЗША самы танны бензін быў 1 снежня на АЗС у Х'юстане - 1,638 дал./галон, а самы дарагі бензін быў у Маямі - 2,024 дал./галон.

Нагадаем, бензін у ЗША пачаў таннець з сярэдзіны ліпеня гэтага года, пасля таго як яго сярэдні за тыдзень рознічны кошт на АЗС дасягнуў па стане на 7 ліпеня новага абсалютнага рэкорду - 4,114 дал./галон.