Суд не аднавіў Франака Вячорку ва ўніверсітэце

Суд Маскоўскага раёну адмовіў Франаку Вячорку ў аднаўленьні на вучобе на трэцім курсе факультэта журналістыкі Белдзяржунівэрсытэту.

Судзьдзя Вольга Гусакова сказала, што працэдурныя нормы адлічэньня не парушаны ў дачыненьні да студэнта Франака Вячоркі. Яна таксама сказала, што Франак прапусьціў тэрміны. Маўляў, трэба было скардзіцца адразу пасьля таго, як яго адлічылі з унівэрсытэту, паведамляе “Радыё Свабода”.

Сам Франак Вячорка сказаў, што і не чакаў іншага рашэньня суду. Але ён лічыць, што такія судовыя справы ўсё роўна будуць мець розгалас і ацэнку ў найбліжэйшай будучыні.

Нагадаем, старшыня культурніцкай камісіі партыі БНФ Франак Вячорка быў адлічаны пасьля таго, як прапусьціў заняткі праз адміністрацыйны арышт за ўдзел у Дні Салідарнасьці 16 студзеня, калі ён быў затрыманы ў цэнтры горада і арыштаваны на 15 сутак нібыта за нецэнзурную лаянку.

15 лютага дэкан факультэта журналістыкі БДУ Сяргей Дубовік паведаміў Франаку, што загадам рэктара за подпісам прарэктара ён адлічаны за "акадэмічную непасьпяховасьць".