Навумаў: «Магчыма, мы крыху паспяшаліся»
10- 31.07.2008, 15:05
Дапамогу Беларусі ў расследаванні крымінальнай справы аб выбуху ў Менску 4 ліпеня аказваюць праваахоўныя органы 5 краін, паведаміў журналістам міністр унутраных спраў Беларусі Ўладзімір Навумаў.
"Дапамогу ў раскрыцці злачынства звязанага з выбухам аказваюць 5 краін", сказаў У.Навумаў.
Пры гэтым ён удакладніў, што "расейскія калегі працуюць з першага дня. Яны будуць дапамагаць расследаваць гэтую справу датуль, пакуль злачынства не будзе раскрытае".
У.Навумаў выказаў упэўненасць у тым, што дадзенае злачынства будзе раскрыта. "Ёсць падставы, каб раскрыць гэтае злачынства, праводзіцца вялікая праца", - падкрэсліў ён.
Разам з тым міністр адзначыў, што ва ўсіх краінах свету пры раскрыцці падобных злачынстваў "міліцыі імкнуцца не перашкаджаць працаваць". "Магчыма, мы крыху паспяшаліся на першапачатковым этапе расследавання злачынства аб выбуху", - сказаў кіраўнік МУС, перадае "Інтэрфакс".
Дакранаючыся пытання аб удзеле ў расследаванні гэтай справы калегаў з праваахоўных органаў іншых краін, міністр адзначыў, што ў аператыўных інтэрасах не называць гэтыя краіны, дадаўшы, што сувязь з імі ў рамках расследавання праводзіцца штотыдзень. Разам з тым ён удакладніў, што "ёсць пэўнае ўзаемадзеянне з калегамі з Турцыі, дзе таксама нядаўна адбыўся выбух".