Французскі турыст выпадкова парушыў беларускую мяжу

За парушэнне польска-беларускай мяжы 17 верасня памежнікамі Берасцейскай памежнай групы быў затрыманы грамадзянін Францыі.

Як паведамілі ў прэс-цэнтры Дзяржаўнага памежнага камітэта Беларусі, мужчына растлумачыў, што знаходзіўся на тэрыторыі Польшчы з турыстычнай мэтай. Едучы на ровары, ён заблукаў і перасёк дзяржаўную мяжу, тым самым здзейсніў правапарушэнне, прадугледжанае арт. 23.31 КаАП (парушэнне рэжыму дзяржаўнай мяжы).

Замежнік прыцягнуты да адміністрацыйнай адказнасці ў выглядзе папярэджання і перададзены прадстаўнікам памежнай варты Польшчы.