Юшчанка сустрэўся з намеснікам старшыні Партыі БНФ
1- 1.12.2009, 9:53
28 лістапада ў Кіеве Ігар Лялькоў выступіў з вітальным словам на з'ездзе партыі «Наша Украіна» ад імя старшыні Партыі БНФ Аляксея Янукевіча.
Як паведаміў БелаПАН намеснік старшыні Партыі БНФ, пасля заканчэння з'езду ён сустрэўся з прэзідэнтам Украіны Віктарам Юшчанкам, які ўзначальвае партыю «Наша Украіна».
«У размове Юшчанка падкрэсліў важнасць сувязяў паміж дэмакратычнымі сіламі Украіны і Беларусі, а таксама адзначыў неабходнасць кансалідацыі высілкаў усіх краінаў Балта-Чарнаморскага рэгіёна ў справе еўрапейскай інтэграцыі на ўмовах захавання нацыянальнай ідэнтычнасці гэтых краінаў», — сказаў Лялькоў.
У той жа дзень адбыліся перамовы Лялькова са старшынём цэнтральнага выканаўчага камітэта «Нашай Украіны» Раманам Бессмертным. Падчас гэтай сустрэчы былі абмеркаваныя пытанні супрацоўніцтва Партыі БНФ і «Нашай Украіны» на міжнароднай арэне, паведаміў намеснік старшыні Партыі БНФ.
