Сідорскі супраць імпарту гародніны і садавіны: галоўнае – «не гнаіць нацпрадукт»

Прадпрыемствы Белкаапсаюза працуюць недастаткова эфектыўна, заявіў сёння на паседжанні Прэзідыўма Саўміна прэм'ер-міністр Сяргей Сідорскі.

Прэм'ер-міністр адзначыў, што стан матэрыяльна-тэхнічнай базы сховішчаў Белкаапсаюза не дазваляе забяспечваць неабходны рэжым захоўвання садавінагародніннай прадукцыі, у сховішчах адсутнічаюць ці не выкарыстоўваюцца сістэмы вентыляцыі і ахаладжэння. «З наяўных у сістэме спажыўкааперацыі 180 сховішчаў 58% наогул не абсталяваныя сістэмай актыўнай вентыляцыі для падтрымання неабходнага рэжыму захоўвання прадукцыі», - падкрэсліў Сяргей Сідорскі.

Ён таксама звярнуў увагу на нездавальняльны стан саміх сховішчаў. «Усе сховішчы садавінагародніннай прадукцыі 60-70-х гадоў, - сказаў прэм'ер-міністр. - Хто перашкаджае вам будаваць новыя такія аб'екты, стварайце новыя сховішчы, уводзіце актыўную вентыляцыю, прадавайце гародніну, якая вырошчваецца ў краіне».

У сваёй працы прадпрыемства Белкаапсаюза могуць раўняцца на паспяховыя прадпрыемствы такога а профіля ў іншых краінах. «Замежныя пастаўшчыкі экспартуюць у нашу краіну такую ж гародніну, як і ў нас, і ў іх усё рэнтабельна, хто ж вам перашкаджае так працаваць, навошта вы гнаіце нацыянальны прадукт, - задаў пытанне Сяргей Сідорскі старшыні Белкаапсаюза Уладзіміру Куляшову. - За вамі галіна, прадпрыемствы, якіх 150, калі яны будуць эфектыўна працаваць».

У сваю чаргу Уладзімір Куляшоў адзначыў, што наяўных у сістэме спажыўкааперацыі плодагароднінасховішчаў дастаткова для захоўвання неабходнага аб'ёму садавінагародніннай прадукцыі. «Новага нам нічога будаваць не трэба, трэба рэканструяваць ужо наяўныя сховішчы, якія выкарыстоўваюцца і ў якіх адсутнічае тэмпературны рэжым ці ёсць іншыя непаладкі», - сказаў ён.

Уладзімір Куляшоў дадаў, што Белкаапсаюз звяртаўся ва ўрад з просьбай аб вылучэнні Br14 млрд. на тэхпераўзбраенне ўсіх сваіх плодагароднінасховішчаў. Рэканструяваць гэтыя аб'екты з прыцягненнем крэдытных рэсурсаў прадпрыемствам невыгодна. «Зараз розніцы паміж закладкай у міжсезонны перыяд і рэалізацыяй прадукцыі практычна няма, - патлумачыў старшыня Белкаапсаюза. - Калі раней увосень мы закладвалі садавінагароднінную прадукцыю па адных коштах, а пазней прадавалі па іншых і атрыманыя сродкі пакрывалі нашыя выдаткі, дык зараз гэтыя кошты практычна зраўняліся».