Міліцыя адмаўляецца расследаваць выкраданні апазіцыянераў

Крымінальная справа па факце выкрадання старшыні «Маладога фронту» Змітра Дашкевіча спыненая.

Крымінальная справа, дзе Зміцер Дашкевіч з'яўляецца пацярпелым, прыпыненая па п.1. ч.1 арт.246 Крымінальнага кодэкса Беларусі – паведамляецца ў лісце, які атрымаў апазіцыянер, за подпісам старэйшага дазнаўцы Заводскага РУУС г. Менска Жабінскага А.М.

Тым не менш, як адзначае прэс-служба «Маладога фронту», у адказе сказана: «Комплекс аператыўна-вышуковых мерапрыемстваў, накіраваных на высвятленне асобаў, якія здзейснілі злачынства, і пошук скрадзенай маёмасці працягваецца».

«Не было адразу ніякіх надзеяў, што пры гэтым рэжыме гэтая крымінальная справа будзе мець іншы вынік», -- пракаментаваў адказ міліцыі старшыня «Маладога фронту» Зміцер Дашкевіч.

Нагадаем, што 5 снежня ў 11 гадзінаў раніцы апазіцыянера ля яго кватэры абкружылі некалькі людзей у цывільным, заламалі рукі, вывелі на вуліцу і запіхнулі ў машыну. У Дашкевіча забралі асабістыя рэчы, надзелі на галаву дзве шапкі, некалькі гадзінаў вазілі ў машыне, пасля чаго пакінулі ў лесе пад Лагойскам.

У снежні 2009 года былі выкрадзеныя адразу некалькі лідэраў беларускай апазіцыі. Адзін з лідэраў грамадзянскай кампаніі «Еўрапейская Беларусь» Яўген Афнагель быў выкрадзены невядомымі 6 снежня. Як распавёў моладзевы актывіст, яго схапілі чатыры чалавекі ў цывільным на вуліцы Бялінскага ў Менску, сілай пасадзілі ў белы аўтамабіль з прыцемненым шклом і вывезлі за горад. Па словах актывіста «Еўрапейскай Беларусі», выкрадальнікі практычна нічога не казалі. Яго галаву прыціснулі да каленяў і выпіхнулі з машыны дзесьці на прасёлкавай дарозе за некалькіх кіламетраў ад барысаўскай трасы.