Пажары дабраліся да заражаных радыяцыяй лясоў

Расейскі цэнтр абароны лесу (Раслесабарона) пацвердзіў паведамленне пра тое, што прыродныя пажары, якія бушуюць, распаўсюдзіліся на лясы з радыяцыйным заражэннем.

Пра гэта паведамляе радыёстанцыя «Маяк».

У Раслесабароне выказалі здзіўленне адносна абвяржэння факту пажараў у лясах, заражаных радыёнуклідамі пасля аварыі на Чарнобыльскай АЭС.

«Ёсць карты забруджванняў, ёсць карты пажараў. Накласці адну на другую можа любы», - патлумачылі ў Расейскім цэнтры абароны лесу.

У прыватнасці, у Бранскай вобласці на тэрыторыі лясоў, заражаных радыяцыяй, адбылося 28 пажараў на плошчы 269 га.

Галоўны санітарны ўрач Расеі Генадзь Анішчанка раней выступаў з абвяржэннем інфармацыі пра ўзгаранні ў лясах, заражаных пасля надзвычайнага здарэння у Чарнобылі.

«Не трэба сеяць паніку, усё там спакойна», - запэўніў кіраўнік Расспажыўнагляда.

Тым часам некаторыя эксперты мяркуюць, што лясныя пажары на тэрыторыі радыяцыйнага забруджвання могуць узняць у паветра радыёактыўны пыл. Разам з тым спецыялісты лічаць, што да сур'ёзных наступстваў гэта не прывядзе.