Да экспертаў АБСЕ па справе Алега Бябеніна трэба ўважліва прыгледзецца

Такое меркаванне выказаў лідэр грамадзянскай кампаніі «Еўрапейская Беларусь» Андрэй Саннікаў.

«Гэтую ініцыятыву МЗС можна толькі вітаць, калі гэта сапраўды сур'ёзна, - сказаў Саннікаў у інтэрв'ю БелаПАН. - Аднак трэба будзе вельмі ўважліва глядзець, што гэта будуць за эксперты. У нас ёсць ужо сумны вопыт заключэння «экспертаў», якія былі запрошаныя ў Беларусь дзяржавай».

Саннікаў нагадаў, што ў траўні 2009 года офіс АБСЭ ў Менску атрымаў запыт ад МЗС Беларусі аб аказанні дапамогі ўраду ў пошуку незалежнага міжнароднага эксперта ў галіне права, які спецыялізуецца ў крымінальным і крымінальна-працэсуальным заканадаўстве ўсходнееўрапейскага рэгіёна, з мэтай вывучэння справы ваўкавыскіх прадпрымальнікаў.

«Офіс АБСЕ прапанаваў кандыдатуру Марціна Фінке. Спецыяліст наведаў Беларусь 8-10 чэрвеня і прызнаў, што справа ў дачыненні да іх расследуецца без юрыдычных парушэнняў, а асцярогі праваабаронцаў аб яе палітычным характары беспадстаўныя. Аднак у выніку суд прызнаў Аўтуховіча, Асіпенку і Лявонава невінаватымі ў тым, што ім інкрымінавалі, - у падрыхтоўцы тэрарыстычнага акту, тым самым перакрэсліўшы «экспертызу» Фінке». Такіх «экспертаў» нам больш не трэба», - сказаў Саннікаў.

Тым не менш, паводле яго словаў, заява МЗС дазваляе сябрам і калегам Бябеніна праявіць ініцыятыву і звярнуцца ў АБСЕ, з тым каб у Беларусь прыбылі «сапраўды незалежныя эксперты», якія правялі б аб'ектыўнае расследаванне смерці журналіста.

«Мы гэтага патрабавалі, і я проста зараз пачну тэлефанаваць сваім сябрам, якія маглі б парэкамендаваць такіх людзей», - заявіў Саннікаў.