У Гомелі забаронены апазіцыйны Першамай

Першамайскі мітынг у Гомелі не адбудзецца. Гарвыканкам скасаваў уласнае рашэнне аб дазволе на правядзенне масавага мерапрыемства.

Заяўнік акцыі Уладзімір Сякерка выканаў усе патрабаванні гарадской адміністрацыі, уключна з тым, што згадзіўся заключыць дамовы на паслугі з камунальнікамі, медыкамі і міліцыянтамі, паведамляе Радыё Рацыя. Аднак улады ў апошні момант забаранілі мітынг, спаслаўшыся на неабходнасць рамонту цеплатрасаў.

- Мяне выклікалі ў гарвыканкам і паведамілі, што дазволены раней мітынг, прысьвечаны Святу працы, забаронены. Мы планавалі правесці мерапрыемства ў дазволеным месцы --на пляцоўцы каля ДК “Віпра”. Справа ў тым, што мы зрабілі вялікую працу сярод насельніцтва, рыхтаваліся да гэтага мерапрыемства дастаткова грунтоўна. Нашымі актывістамі было распаўсюджана вялікая колькасць улётак. Падчас кантактаў з людзьмі адчувалася, што гамельчукі зацікаўленыя ва ўдзеле ў дадзеным мерапрыемстве. Выглядае на тое, што гэта адчулі ўлады. Таму і прынялі такое рашэнне.

За апошнія сем гадоў у Гомелі не адбылася аніводнай дазволенай уладамі масавай акцыі з удзелам прадстаўнікоў апазіцыі. Мітынг з нагоды Міжнароднага дня салідарнасці працоўных мусіў паставіць кропку на традыцыі забароны вулічнай актыўнасці. Але, як мяркуе кіраўнік абласнога аддзяленьня партыі “Справядлівы свет” Уладзімір Сякерка, кіраўніцтва гораду, відаць, спалохалася актыўнасці грамадзянаў.