Алесь Міхалевіч: Патрэбныя эканамічныя санкцыі

Алесь Міхалевіч, які атрымаў прытулак у Чэхіі, лічыць, што для вызвалення палітвязняў у Беларусі трэба выкарыстоўваць усе магчымыя негвалтоўныя метады, у тым ліку эканамічныя санкцыі.

«Эканамічныя санкцыі павінныя быць уведзеныя і павінныя дзейнічаць да таго часу, пакуль не будзе адпушчаны апошні палітвязень», - заявіў ён 5 мая на прэс-канферэнцыі ў Вільні, піша БелаПАН.

«Уся мая цяперашняя дзейнасць сканцэнтраваная на адным - вызваленні палітвязняў», - падкрэсліў Міхалевіч. З гэтай мэтай ён мае намер наведаць шэраг краін. У бліжэйшых планах палітыка - наведванне Жэневы, дзе ён плануе сустрэцца з прадстаўнікамі структур ААН, якія займаюцца пытаннямі прадухілення катаванняў і нялюдскага абыходжання.

Міхалевіч таксама паведаміў, што мае намер стаць адной з ключавых фігур, якія будуць арганізоўваць судовы пераслед Аляксандра Лукашэнкі.

Нагадаем, 28 сакавіка падчас онлайн-канферэнцыі на сайце беларускай службы «Радыё Свабода» Міхалевіч распавёў, што ўсталяваў кантакт з брытанскай юрыдычнай фірмай H2O Law, юрысты якой рыхтуюцца ініцыяваць прыватнае судовы пераслед Лукашэнкі за парушэнне правоў чалавека.