Мінабароны закупляе беспілотнікі

Авіярамонтны завод у Баранавічах атрымаў заказ на пастаўку комплексаў беспілотнай паветранай выведкі з беспілотнымі лятальнымі апаратамі (БЛА) «Грыф- 1».

«Мінабароны Беларусі папярэдне замовіла ў нас некалькі дзесяткаў БЛА «Грыф-1», - паведаміў у сераду начальнік упраўлення па развіцці ААТ «558-ы «Авіяцыйны рамонтны завод» Павел Случак.

Ён адзначыў, што працы па стварэнні новага комплексу з БЛА «Грыф-1» вядуцца ў рамках дзяржаўнай навукова-тэхнічнай праграмы «Беспілотныя авіяцыйныя комплексы і тэхналогіі іх вытворчасці», перадае «Інтэрфакс».

«Праграма стварэння комплексу стабільна фінансуецца з дзяржбюджэту, тэрмін завяршэння АКР - канец 2013 года», - сказаў Случак.

Паводле яго слоў, усяго на сённяшні дзень пабудавана два БЛА. Пад'ём у паветра першых вопытных узораў адбыўся 21 лютага гэтага года. У цяперашні час абодва «беспілотнікі» праходзяць стадыю лётна-канструктарскіх выпрабаванняў.

«Да канца наступнага года плануецца вырабіць 6 комплексаў, якія будуць аснашчаны карыснымі нагрузкамі, пэўнымі тэхнічным заданнем Мінабароны», - сказаў Случак.

Ён паведаміў, што ў склад комплексу ўваходзяць машына - камандны пункт, інжынерная машына з кантрольна-праверачнай апаратурай і абсталяваннем і транспартная машына з чатырма БЛА.

«Уся мэтавая нагрузка цалкам беларуская. Рухавік на БЛА «Грыф-1» імпартны», - сказаў Случак.

ААТ «558-ы Авіяцыйны рамонтны завод» спецыялізуецца на рамонце баявых самалётаў Су-17, Су-25, Су-27 і МіГ-29, а таксама верталётаў Мі-8 і Мі-24. У апошні час тут асвоены рамонт навучальных самалётаў Л-39.