Супрацоўнікі віцебскай авіякампаніі з траўня не атрымліваюць зарплату

Новая авіякампанія «Вітавія» так і не пачала пасажырскія палёты.

Пачалася гэтая гісторыя ў чэрвені 2011 года, калі старшыня аблвыканкама Аляксандр Касінец, міністр транспарту і камунікацый Аляксандр Шчэрба і член савета дырэктараў чэшскай кампаніі «PDW-group sro» Павел Гарадноў падпісалі інвестыцыйную дамову аб стварэнні на базе аэрапорта «Віцебск» авіятранспартнай кампаніі. Для большай самавітасці пры падпісанні прысутнічаў яшчэ і віцэ-прэм'ер Анатоль Тозік, пішуць «Народные новости Витебска».

Беларускіх чыноўнікаў, якія падпісалі дамову са спадаром Гарадновым, не збянтэжыла ні тое, што ён з'яўляецца акадэмікам «Сусветнай космагуманістычнай лігі нацый», ні тое, што ў кампаніі «PDW-group sro», якая абяцае інвеставаць у бюджэт Віцебскай вобласці 50 мільёнаў еўра, статутны фонд складае ўсяго 5 мільёнаў чэшскіх крон або каля 200 000 еўра.

Як бы там ні было, у Беларусі зарэгістравалі Замежнае прыватнае ўнітарнае авіятранспартнае прадпрыемства «Вітавія», яно пачало набор персаналу і падрыхтоўку пакета дакументацыі, неабходнай для ажыццяўлення авіяперавозак. «PDW-group sro» з «Aircraft Industries» быў заключаны кантракт коштам 7 мільёнаў еўра на зборку двух самалётаў L-410 і навучанне шасці лётчыкаў і шасці тэхнікаў.

Праблемы паўсталі, калі «Вітавія» у лютым 2012 года згодна з кантрактам хацела адправіць лётчыкаў на навучанне ў Чэхію. Аказалася, што самалёты пабудаваныя (яны і зараз яшчэ знаходзяцца на заводзе), але грошы за іх не заплацілі. Натуральна, што чэхі адмовіліся афармляць візы і навучаць беларускі персанал, пакуль не атрымаюць хоць нейкіх грошай па кантракце.

Інвестар у асобе Паўла Гараднова тлумачыў, што ён не можа пералічыць грошы, пакуль не зацверджаны генеральны план развіцця кампаніі. Сапраўды, калі Віцебскі аблвыканкам падпісаў генплан яшчэ ў канцы 2011 года, то дамагчыся яго зацвярджэння Дэпартаментам па авіяцыі Міністэрства транспарту і камунікацый аказалася нялёгка. Па словах намесніка дырэктара па арганізацыі лётнай працы «Вітавія» Івана Навічкова, там, мякка кажучы, сустрэлі без энтузіязму з'яўленне патэнцыйнага канкурэнта «Белавія».

Новай авіякампаніі прапаноўвалі адмовіцца ад міжнародных пасажырскіх і грузавых авіяперавозак, а абмежавацца толькі рэйсамі ўнутры Беларусі. Не трэба быць блізкім да авіяцыі, каб зразумець, што палёты з Віцебска ў Бабруйск наўрад ці будуць рэнтабельнымі. У рэшце рэшт, з шэрагам агаворак, генеральны план развіцця авіякампаніі «Вітавія» быў зацверджаны дэпартаментам па авіяцыі толькі 29 чэрвеня 2012 года, г.зн. праз год пасля заключэння інвестыцыйнай дамовы, што гэтую дамову і парушала, так як зацвярджэнне павінна было адбыцца ў канцы 2011 года, і затрымка склала паўгода.

Аднак і пасля зацвярджэння генплана інвестар грошай за самалёты не пералічыў. Больш за тое, калі да траўня 2012 года віцебская авіякампанія атрымлівала ад яго сродкі на арэнду памяшканняў і заработную плату, то цяпер і гэтага не стала. Больш за два дзесяткі чалавек засталіся без сродкаў да існавання. Павел Гарадноў усё радзей з'яўляўся ў Віцебску, а затым і зусім перастаў адказваць на тэлефонныя званкі.

Скрозь пальцы глядзелі на падзеі, якія робяцца ў «Вітавія», начальнік аддзела транспарту і камунікацый аблвыканкама Андрэй Гулідзін і намеснік старшыні аблвыканкама Анатоль Дзіулін. Тое, што чыноўнікаў не хвалявалі супрацоўнікі прыватнай кампаніі, якія сядзяць без зарплаты, - не дзіўна.

Але ж ужо некалькі месяцаў не паступаюць у дзяржаўную казну падаткі і арэндная плата за памяшканні ў віцебскім аэрапорце! Пры гэтым у верасні друкаваны орган Віцебскага аблвыканкама - газета «Витебский рабочий» - працягвала публікаваць на першай старонцы пераможныя рэляцыі аб стварэнні ўжо цэлага холдынгу «Vitavia». Пра тое, што яго работнікі некалькі месяцаў сядзяць без грошай, не паведамлялася.

Кожнаму цярпенню прыходзіць канец. Частка работнікаў гаротнай авіякампаніі падалі на працадаўцу ў суд, першае пасяджэнне адбылося, але адказчык на яго не з'явіўся. Іншыя са сваёй праблемай «прабіліся» на прамую лінію з памочнікам прэзідэнта Мікалаем Дамашкевічам, якая адбылася 17 кастрычніка. Ён даў даручэнне намесніку старшыні аблвыканкама Уладзіміру Навацкаму разабрацца з праблемай, але з працаўнікамі кампаніі пакуль ніхто не сустракаўся.