Пуцін адказаў Лукашэнку: Не дачакаешся

Пуцін лічыць, што чуткі аб праблемах з яго здароўем выгадныя апанентам і адказвае ім традыцыйна - «не дачакаецеся».

На вялікай прэс-канферэнцыі ў чацвер у Маскве прэзідэнта спыталі, каму выгадныя размовы пра яго дрэннае самаадчуванне, піша «Інтэрфакс».

«Выгадна палітычным апанентам, якія імкнуцца паставіць пад сумнеў легітымнасць і дзеяздольнасць улады», - сказаў Пуцін.

«На пытанне пра здароўе магу адказаць традыцыйна - не дачакаецеся», - дадаў ён.

На заўвагу журналісткі, якая паведаміла, што перад прэс-канферэнцыяй яна зноў убачыла ў інтэрнэце «спецыфічную інфармацыю» пра здароўе прэзідэнта, Пуцін параіў: «Вы менш туды глядзіце».

Нагадаем, у інтэрв'ю агенцтву Рэйтэр беларускі кіраўнік Аляксандр Лукашэнка, які захапляецца хакеем, распавёў, што не можа згуляць са сваім расейскім калегам Уладзімірам Пуціным, паколькі той пашкодзіў пазваночнік. Аб гэтым Лукашэнка сказаў, адказваючы на пытанне, ці гуляе ён у хакей з Пуціным, які таксама неабыякавы да спорту і культывуе вобраз стромкага хлопца.

«Пазваночнік дзесьці пашкодзіў ён. У барацьбе. Змагаўся дзесьці на дыване і пашкодзіў пазваночнік. Таму адкладаецца нашая сустрэча. Я ведаю яго гэтую праблему. Ён любіць дзюдо. Ён падняў хлопца, здзейсніў кідок і згарнуў пазваночнік», - паведаміў Лукашэнка .

Пры гэтым прэс-сакратар Пуціна Дзмітрый Пяскоў адмовіўся тады каментаваць выказванні Лукашэнкі.