Зянон Пазьняк: КДБ будзе займацца выбарамі
72- 15.02.2012, 12:03
Лідэр КХП-БНФ Зянон Пазьняк лічыць, што Лукашэнка баіцца байкоту выбараў, таму паехаў у КДБ, каб чэкісты забяспечылі яўку людзей на выбары.
Па ягоных словах, у далейшым такая арганізацыя не можа існаваць, а яе функцыянеры павінныя будуць несці крымінальную адказнасць.
«Тое, што Лукашэнка паехаў у КДБ, і тое, што ён сказаў, значыць, што ён баіцца байкоту, і паставіў задачу перад кадэбэшнікамі, каб тыя забяспечылі прыгон насельніцтва на галасаванне. Неўзабаве мы гэта ўбачым і адчуем.
Што тычыцца моцы КДБ, то ён быў моцны ў 1930-х гадах у Савецкім Саюзе, калі праводзіў масавыя рэпрэсіі, і моцны зараз у Лукашэнкі ў гэтым рэжыме. Але зараз ён фактычна выведзены з прававога поля і ператвораны ў напаўкрымінальную структуру, якая абслугоўвае ўладу, абслугоўвае дыктатуру. Таму тое, якія функцыі цяпер выконвае КДБ, тое, чым КДБ займаецца, усё гэта будзе падлягаць крымінальным ацэнкам. Такая арганізацыя ў далейшым не можа існаваць, яна павінная быць расфарміраваная, і гэтымі функцыянерамі, не сумняюся, будуць займацца пракуратура і судовыя органы, таму што тое, што робіць зараз Камітэт дзяржбяспекі - гэта выкананне рэпрэсіўнай палітыкі ўлады, суцэльнае парушэнне закона.
Як гэта можна ставіць задачу Камітэту дзяржбяспекі займацца выбарамі? КДБ будзе займацца выбарамі? Забяспечваць яўку людзей і адпаведныя галасы? І кіраўнік ўлады едзе ў КДБ ставіць такія задачы. Высновы з гэтага будуць, я спадзяюся, бо гэты рэжым ужо даходзіць да, так бы мовіць, унутранага абсурду ў сваіх паводзінах», - сказаў Зянон Пазьняк у інтэрв'ю «Радыё Свабода».