Бердымухамедаў стаў ганаровым прафесарам БДУ
58- 27.04.2012, 18:22
Туркменскі дыктатар Гурбангулы Бердымухамедаў стаў ганаровым прафесарам Беларускага дзяржаўнага універсітэта.
Дыплом уручыў сёння Туркменбашы рэктар галоўнай беларускай ВНУ Сяргей Абламейка.
Ганаровае званне прысвоенае «за вялікі ўклад у развіццё навукі, двухбаковых беларуска-туркменскіх адносінаў, умацаванне культурных і адукацыйных сувязяў». У цяперашні час ганаровымі прафесарамі ВНУ з'яўляюцца 25 чалавек.
Гурбангулы Бердымухамедаў распавёў, што дамоўленасці па розных сферах - палітычнай, эканамічнай і гуманітарнай - паміж Беларуссю і Туркменістанам паспяхова рэалізуюцца, краіны вядуць актыўны палітычны дыялог, арганізуюць канструктыўныя сустрэчы, а тавараабарот павялічваецца ў разы. «БДУ - гэта буйная, вядомая ў свеце ВНУ, якая аказала значны ўплыў на развіццё навуковага патэнцыялу свету, з'яўляецца флагманам сістэмы адукацыі краіны. У Туркменістане таксама актыўна развіваецца сістэма адукацыі. За некалькі апошніх гадоў інвеставаныя ў адукацыю, асабліва ў сучасныя тэхналогіі, значныя сродкі», - распавёў Туркменбашы. Ён дадаў, што на сустрэчы з Лукашэнкам былі абмеркаваныя перспектывы супрацоўніцтва ў гэтай сферы, а таксама пытанне аб міжуніверсітэцкім абмене студэнтаў і выкладчыкаў.