Мясніковіч увосень паляціць у Бангладэш

Прэм'ер-міністр Беларусі можа здзейсніць візіт у Бангладэш увосень гэтага года.

Аб гэтым паведамілі агенцтву «Інтэрфакс-Захад» у прэс-службе беларускага МЗС па выніках перамоў міністраў замежных спраў дзвюх дзяржаў.

«Мы дамовіліся, што пачынаем да падрыхтоўкі візіту прэм'ер-міністра Беларусі ў Бангладэш, які, як мяркуецца, можа адбыцца ўвосень гэтага года. У якасці падрыхтоўчага этапу гэтага візіту, акрамя паседжання камісіі ў Менску, мы запрасілі здзейсніць дэлегацыі дзелавых колаў Бангладэш візіт у Беларусь» , - заявіў кіраўнік МЗС Сяргей Мартынаў журналістам пасля перамоў з кіраўніком МЗС Бангладэш Дыпу Моні.

Як адзначыў беларускі міністр, «за апошнія месяцы мелі месца істотная інтэнсіфікацыя адносінаў паміж Беларуссю і Бангладэш, абмен візітамі рознага ўзроўню па розных напрамках супрацоўніцтва». С.Мартынаў праінфармаваў, што тавараабарот паміж краінамі ў мінулым годзе склаў «парадку $140 млн і вырас у 2,5 разы».

«Мы дамовіліся аб неабходнасці дыверсіфікаваць наш тавараабарот, таму што на сённяшні дзень ён складаецца пераважна з угнаенняў. Дыверсіфікаваць неабходна за кошт тэхнікі, абсталявання і іншых відаў прадукцыі, што вырабляецца ў Беларусі і Бангладэш», - сказаў С.Мартынаў.

«У якасці наступнага этапу, мы дамовіліся аб магчымым узаемадзеянні па зборцы абсталявання і тэхнікі ў Бангладэш, а таксама аб вытворчасці фармацэўтычнай прадукцыі ў Беларусі», - дадаў міністр.

Акрамя таго, паводле яго, дасягнутая дамоўленасць аб стварэнні двухбаковай камісіі, першае паседжанне якой пройдзе ў Менску ўвосень гэтага года.