Першы пайшоў: Андрэя Бандарэнку паставілі на ўлік у КДБ

Дырэктара інфармацыйна-асветніцкай установы «Платформа» Андрэя Бандарэнку даставілі ў КДБ.

У ведамстве яго паставілі на прафілактычны ўлік, паведамілі «Белорусскому партизану» у «Платформе».

Гадзіну таму ў будынку Першамайскага РАУС Менска двое ў цывільным, прад'явіўшы пасведчанні супрацоўнікаў Камітэта дзяржаўнай бяспекі, настойліва прапанавалі Андрэю Бандарэнке праехаць з імі. Андрэй Бандарэнка запомніў прозвішча аднаго з супрацоўнікаў, гэта Прэеў Аляксандр Мікалаевіч.

Бандарэнка быў дастаўлены ў Камітэт дзяржаўнай бяспекі, дзе яго азнаёмілі з пастановай аб пастаноўцы на прафілактычны ўлік у КДБ. Таксама дырэктару ІАУ «Платформа» прапанавалі распісацца за азнаямленне з пастановай на ўлік.

На патрабаванне аб прадастаўленні копіі пастановы, супрацоўнікі КДБ адказалі адмоўна. Андрэю Бандарэнке было прапанавана азнаёміцца з усімі дакументамі ў справе і зрабіць неабходныя выпіскі. На просьбу апазіцыянера даць яму ручку і ліст паперы, каб зрабіць неабходныя выпіскі, была атрымана адмова.

ІАУ «Платформа» накіруе ў Камітэт дзяржаўнай бяспекі запыт аб прадастаўленні дакументальнага пацвярджэння аб пастаноўцы Андрэя Бандарэнкі на ўлік у органах Камітэта дзяржаўнай бяспекі.

Нагадаем, 4 ліпеня Аляксандр Лукашэнка падпісаў указ № 295. Ён уносіць змяненні і дапаўненні ва ўказ «Аб спрашчэнні парадку выезду з Рэспублікі Беларусь» ад 2007 года.

У прыватнасці, у адпаведнасці з новымі папраўкамі, выезд за межы краіны цяпер будзе абмежаваны асобам, якія «стаяць на прафілактычным уліку ў органах дзяржаўнай бяспекі Рэспублікі Беларусь». У адпаведную базу дадзеных іх будзе ўносіць КДБ. Раней КДБ меў права ўносіць тых беларусаў, якія валодалі дзяржаўнымі сакрэтамі. Астатніх уносілі міністэрства ўнутраных спраў, юстыцыі і абароны.

Указ фактычна ўзаконіў забарону на выезд за мяжу для апазіцыянераў.