Алег Волчак: Сацыяльныя сеткі перакрыць нельга

Затрыманні сеткавых актывістаў не спыняць распаўсюджванне інфармацыі ў Інтэрнэце.

У Менску затрыманыя адміністратары апазіцыйных груп у сацыяльных сетках. Сярод іх, як паведамляў сайт charter97.org, Раман Пратасевіч, Андрэй Ткачоў і некалькі іншых людзей, якія адміністравалі групы «Надакучыў нам гэты Лукашэнка» і «Толькі ШОС». Затрыманне мадэратараў інтэрнэт-супольнасцяў пракаментаваў для «Радыё Свабода» праваабаронца Алег Волчак.

«Сацыяльныя сеткі - моцная інфармацыйная зброя, дзякуючы якой людзі могуць выказваць сваё меркаванне і збіраць вакол сябе сяброў-аднадумцаў. Раней зрабіць гэта было нашмат цяжэй.

Натуральна, сацыяльныя сеткі - гэта таксама хуткае распаўсюджванне інфармацыі. Таму мы і бачым напярэдадні выбараў пераслед лідэраў гэтых інтэрнэт-структур.

Бо ўлада бачыць, што грамадскасць рыхтуецца да шырокага байкоту. Для іх важна, каб да «выбараў» як мага менш людзей пра гэта ведала, асабліва моладзі. Таму ўпор робіцца на тое, каб нейтралізаваць актывістаў, запалохаць. Гэта мы не раз ужо праходзілі.

Наколькі эфектыўная гэтая палітыка? Я думаю, што ўлада абрала недальнабачны шлях, так як сацыяльныя сеткі перакрыць нельга. Прыйдуць новыя людзі, мадэратары прымуць новыя імёны і зробяць новы брэнд. Такім чынам будуць і надалей распаўсюджваць інфармацыю аб парушэнні праў грамадзян у Беларусі », - сказаў Алег Волчак.