Дырэктару ваўкавыскага прадпрыемства «свеціць» 12 гадоў турмы

Турэмнае зняволенне пагражае дырэктару прыватнага гандлёвага прадпрыемства Ваўкавыска за крадзяжы і нявыплату падаткаў.

Пра гэта паведамілі ў прэс-службе КДК Гродзенскай вобласці.

Дырэктар прадпрыемства райцэнтра трапіў у поле зроку супрацоўнікаў Ваўкавыскага міжраённага аддзела УДФР КДК па Гродзенскай вобласці прыкладна паўгода таму. Ён пазычаў прадукцыю беларускіх вытворцаў, стараўся прадаць яе даражэй, але пры гэтым недаплочваў падаткі ў бюджэт, а таксама не пагашаў крэдыторскія абавязацельствы сваёй фірмы, піша БелТА.

Супрацоўнікі фінансавай міліцыі правялі праверку, якая паказала, што кіраўнік наўмысна заніжаў падатковую базу, афармляў першасныя ўліковыя дакументы ад імя менскай ілжэпрадпрымальніцкай структуры, схаваў выручку ад рэалізацыі тавараў за наяўны разлік. Такім чынам, за няпоўныя два гады ён ухіліўся ад выплаты падаткаў на суму Br421 млн. За прычыненне шкоды дзяржаве ў выглядзе нявыплачаных падаткаў у дачыненні да бізнесмена ўзбуджаная крымінальная справа па ч.2 арт.243 КК РБ (ухіленне ад выплаты сум падаткаў, збораў).

Адначасова высветліліся факты ўхілення дырэктара ад пагашэння крэдыторскай запазычанасці ў буйных памерах, хоць у яго была рэальная магчымасць разлічыцца з крэдыторамі пасля рэалізацыі тавараў за наяўны разлік у суме больш як Br600 млн. Па гэтых фактах Ваўкавыскім міжрайаддзелам УДФР КДК таксама распачата некалькі крымінальных спраў па прыкметах складу злачынства, прадугледжанага арт.242 КК (ухіленне ад пагашэння крэдыторскай запазычанасці).

Паводле інфармацыі КДК, у далейшым былі выкрытыя факты неаднаразовых крадзяжоў маёмасці беларускіх суб'ектаў гаспадарання, учыненыя дырэктарам шляхам злоўжывання службовымі паўнамоцтвамі. Бізнесмен, загадзя ведаючы пра закрытыя банкаўскія рахункі свайго прадпрыемства, мільярдныя пазыкі і невыкананне судовага рашэння аб іх спагнанні, наўмысна заключаў дамовы з айчыннымі прадпрыемствамі і, злоўжываючы даверам, атрымліваў без аплаты прадукцыю. Па гэтых фактах АБЭЗ Ваўкавыскага РАУС распачаў у дачыненні да бізнесмена крымінальныя справы па арт.210 КК Беларусі (крадзеж шляхам злоўжывання службовымі паўнамоцтвамі).

Матэрыялы праверак перададзеныя ў Ваўкавыскі раённы аддзел Следчага камітэта Рэспублікі Беларусь. Бізнесмену пагражае пакаранне ў выглядзе пазбаўлення волі на тэрмін ад 5 да 12 гадоў з канфіскацыяй маёмасці і з пазбаўленнем права займаць пэўныя пасады або займацца пэўнай дзейнасцю.