Відэа затрымання дырэктара «Маналітграду»
34- 10.10.2013, 13:38
- 41,871
У момант затрымання кіраўнік будаўнічага прадпрыемства спрабаваў пазбавіцца ад сотавага тэлефона.
Трыццацігадовы дырэктар сталічнай арганізацыі і не падазраваў, што доўгі час знаходзіцца пад наглядам у аператыўнікаў. Першапачаткова ён адмаўляў усе абвінавачванні, аднак ужо дае паказанні, паведамляе тэлеканал ОНТ.
Дырэктар «Маналітграду» быў затрыманы 9 кастрычніка пры атрыманні хабару ў асабліва буйным памеры з доказамі злачынства. Спыненне супрацьпраўнай дзейнасці службовай асобы стала вынікам сумесных аператыўна-вышуковых мерапрыемстваў ГУБАЗіК МУС Рэспублікі Беларусь і УБЭП ГУУС Менгарвыканкама.
«Супрацоўнікамі названых падраздзяленняў на працягу апошніх трох гадоў праводзілася праверка фактаў злоўжывання службовымі паўнамоцтвамі, вымагальніцтва і атрымання хабараў кіраўніцтвам ААТ «МаналітГрад», - гаворыцца ў паведамленні МУС.
Дырэктару прадпрыемства пагражае да 15 гадоў пазбаўлення волі.
ААТ «МаналітГрад» - будаўнічае прадпрыемства, акцыі якога належаць Міністэрству архітэктуры і будаўніцтва Рэспублікі Беларусь.
Высветлілася, што падазраваны вымагаў у прадстаўніка камерцыйнай арганізацыі 125 млн. рублёў за своечасовасць плацяжоў па выніках выканання субпадрадных работ у доме ЖБВК «Маладосць Міншчыны». Падчас атрымання 95 млн. з патрабаванай сумы ён і быў затрыманы.
Дом, які будуецца, уваходзіць у лік праблемных дамоў і стаіць на кантролі ў рабочай групы, створанай па даручэнні Лукашэнкі для вывучэння праблемных пытанняў будаўнічай галіны.