Арыштаванага дырэктара «Крычаўцэментнашыфер» пазбавілі «Чалавека года»

Леаніда Скоцкага, які знаходзіцца пад арыштам, пазбавілі ганаровага звання.

Гендырэктара «Крычаўцэментнашыфер» Леаніда Скоцкага, які быў затрыманы па падазрэнні ў крадзяжы грашовых сродкаў у памеры 40 мільёнаў рублёў, рашэннем Крычаўскага райвыканкама пазбавілі ганаровага звання «Чалавек года Крычаўскага раёна» за «здзяйсненне карупцыйнага злачынства».

Адпаведную інфармацыю на сваіх старонках у матэрыяле «Пазбаўлены ганаровага звання» надрукавала дзяржаўная крычаўская раённая газета «Кричевская жизнь».

Нагадаем, што супраць Леаніда Скоцкага УСК па Магілёўскай вобласці ўзбуджаныя тры крымінальныя справы па ч. 2 арт. 430 КК РБ (атрыманне хабару паўторна, альбо загадзя незаконнае дзеянне (бяздзейнасць), альбо групай асоб па папярэдняй змове, альбо ў буйным памеры), піша ПЦ «Вясна».

Леанід Скоцкі быў прызнаны «Чалавекам года» Крычаўскага раёна ў 2012 годзе. У судзе крымінальная справа былога генеральнага дырэктара «Крычаўцэментнашыфер» яшчэ не разглядалася, аднак Крычаўскі райвыканкам ужо зрабіў свой прысуд - пазбавіў Леаніда Скоцкага ганаровага звання за здзяйсненне карупцыйнага злачынства.

Незалежная крычаўская газета «Вольный город» (№ 42 ад 27 кастрычніка) таксама паведамляе, што з жонкай арыштаванага генеральнага дырэктара Н. Скоцкай, якая працавала дырэктарам музычнай школы № 1 Крычава, пасля яго арышту кіраўніцтва ўпраўлення ідэалогіі, культуры і маладзёжнай палітыкі Крычаўскага райвыканкама скасавала кантракт і цяпер яна працуе простым педагогам. Па словах журналістаў «Вольного города», раней ніякіх прэтэнзій з боку кіраўніцтва да працы Скоцкай не было, яна паспяхова спраўлялася са сваімі абавязкамі.

Паказальна, што раней мясцовыя ўлады Крычаўскага раёна не звярталі ніякай увагі на непрыстойныя справы былога генеральнага дырэктара, хоць пра іх неаднаразова пісала незалежная газета «Вольный город». Калі ж абставіны змяніліся, раённыя ўлады не сталі нават чакаць заключэння суда.