Дзмітрый Балкунец: Захоп закладніка прычыніў сур'ёзную шкоду Беларусі

Хутчэй за ўсё, Уладзіслава Баўмгэртнэра ў Расеі вызваляць.

Такім чынам палітолаг Дзмітрый Балкунец пракаментаваў сайту charter97.org экстрадыцыю генеральнага дырэктара «Уралкалія» на радзіму.

«Гэта быў зусім чаканы крок, і беларускі бок, як я ўжо казаў, паспрабаваў не ўпасці тварам у бруд. Наўрад ці былі дасягнутыя канчатковыя дамоўленасці з беларускім бокам, але, магчыма, купля акцый «Уралкалія» і змена уласнікаў таксама паўплывала на хуткае развязанне канфлікту і экстрадыцыю расейскага грамадзяніна. Напэўна, у Расеі справу Баўмгэртнэра наогул закрыюць. Калі гэта сапраўды так адбудзецца, то Менск атрымае пэўны ўрок, бо мэта ў выглядзе кампенсацыі 100 мільёнаў даляраў не дасягнутая. Гэта значыць фактычна ў гэтым выпадку расейскі бок, выкарыстоўваючы розныя механізмы, дамогся вяртання свайго грамадзяніна на радзіму», - сказаў Дзмітрый Балкунец.

Палітолаг адзначыў, што адзінае, чаго дамогся беларускі бок, гэта вывядзенне пытання ў палітычнае рэчышча, скандал і, магчыма, змена ўладальніка «Уралкалія».

«Захоп закладніка ў асобе Баўмгэртнэра не спрыяў падвышэнню інвестыцыйнага клімату ў Беларусі, і прычыніў вельмі сур'ёзную шкоду агульнай сітуацыі ў сферы прыцягнення інвестыцый і вядзення бізнэсу ў Беларусі. Таму ўсе спробы Мясніковіча і ўрада прыцягнуць інвестыцыі і прадаць прадпрыемствы, вядома, могуць не знайсці падтрымкі ў інвестараў, якія былі б гатовыя ўкладваць інвестыцыі ў беларускую эканоміку. Бо такія схемы вядзення бізнэсу і стаўленне да яго шкодзяць ўсёй эканамічнай сітуацыі ў краіне», - сказаў ён.

Нагадаем, Уладзіслаў Баумгэртнэр быў затрыманы ў Менску 26 жніўня, яму было выстаўленае абвінавачванне ў злоўжыванні ўладай і службовымі паўнамоцтвамі і ўжытая мера стрымання ў выглядзе ўтрымання пад вартай. Праз месяц мера стрымання была замененая на хатні арышт, удакладненае абвінавачванне. У канцы кастрычніка на 2 месяцы падоўжаныя тэрміны расследавання крымінальнай справы ў дачыненні да гендырэктара «Уралкалія», ён пакінуты пад хатнім арыштам.

У кастрычніку таксама ў дачыненні да Баўмгэртнэра Басманным раённым судом Масквы завочна абраная мера стрымання ў выглядзе ўтрымання пад вартай. 22 кастрычніка 2013 года падчас двухбаковых кансультацый прадстаўнікам Генпракуратуры Беларусі быў перададзены запыт аб яго выдачы для прыцягнення да крымінальнай адказнасці.

Экстрадыцыі і вызвалення Уладзіслава Баўмгэртнэра неаднаразова патрабавалі прадстаўнікі ўлады Расейскай Федэрацыі.

21 лістапада гендырэктар «Уралкалія» быў экстрадаваны ў Маскву. Цяпер ён знаходзіцца ў адным са следчых ізалятараў расейскай сталіцы.

Фота: dw.de