Нацбанк заклікаў банкі быць больш сумленнымі

Нацбанк рэкамендаваў банкам выключыць практыку ўстанаўлення гадзіннай, штодзённай і штомесячнай адсоткавай стаўкі па крэдытах.

Гэтую хітрасць банкі сталі выкарыстоўваць, каб не палохаць насельніцтва вельмі высокімі гадавымі стаўкамі, якія даходзяць да 90 адсоткаў.

Нацыянальны банк Беларусі ў лісце рэкамендаваў камерцыйным банкам устрымацца ў першым квартале 2013 года ад увядзення новых складаных банкаўскіх крэдытных прадуктаў, якія змяшчаюць спадарожныя платныя банкаўскія паслугі, паведамляе БелТА.

Ліст быў разасланы банкам па выніках нарады рэгулятара з камерцыйнымі банкамі ў сувязі з уступленнем у сілу абноўленага Банкаўскага кодэкса Беларусі. Удзельнікі нарады абмеркавалі найбольш праблемныя пытанні рознічных крэдытаў, поўнай адсоткавай стаўкі па крэдыце і інфармацыйнай адкрытасці.

У лісце рэгулятар таксама рэкамендуе камбанкам у рамках мерапрыемстваў па павелічэнні долі безнаяўных рознічных плацяжоў падаваць кліентам магчымасць атрымання крэдыту ў безнаяўнай форме, так як прадастаўленне наяўных грашовых сродкаў з'яўляецца асобнай банкаўскай аперацыяй (ажыццяўленне касавага абслугоўвання кліентаў) з магчымасцю спагнання за гэтую аперацыю платы ў адпаведнасці з тарыфамі банка.

Памер адсоткаў за карыстанне крэдытам у інфармацыі аб умовах крэдытавання і ў крэдытнай дамове банкам рэкамендавана ўстанаўліваць зыходзячы з гадавой адсоткавай стаўкі, выключыўшы практыку ўстанаўлення гадзіннай, штодзённай, штомесячнай адсоткавай стаўкі па крэдыце.

Таксама банкам рэкамендуецца на працягу 2013 года прывесці дамоўныя адносіны па овердрафтных крэдытах у адпаведнасць з патрабаваннямі Банкаўскага кодэкса Беларусі.

Паколькі дамовы страхавання, паручыцельства, закладу з'яўляюцца асобнымі відамі абавязацельстваў і спагнанне платы за кампенсацыю выдаткаў па іх афармленні не адносіцца да дадатковых плацяжаў (камісій) за карыстанне крэдытам, рэгулятар рэкамендуе банкам пашырыць лінейку рознічных банкаўскіх крэдытных прадуктаў, падаўшы кліентам магчымасць выбару крэдытаў з рознымі спосабамі забеспячэння выканання абавязацельстваў па крэдыце і мінімізацыі крэдытных рызык.

Таксама Нацбанк рэкамендуе актуалізаваць інфармацыю па рознічных крэдытных прадуктах на інтэрнэт-сайтах банкаў, зрабіўшы яе празрыстай, даступнай, поўнай і дакладнай.

Рэкамендацыі дадзеныя камбанкам для фарміравання сацыяльна адказных паводзінаў у дачыненні да спажыўцоў банкаўскіх паслуг, стварэння празрыстых па кошце рознічных банкаўскіх крэдытных прадуктаў, даступных для разумення тым кліентам-фізічным асобам, якія не валодаюць адмысловымі фінансавымі ведамі, удакладняе ў лісце Нацыянальны банк.