Магілёўскі турэмшчык пагарэў на хабары

За спробу атрымаць хабар у пяць мільёнаў рублёў у Круглым Магілёўскай вобласці затрыманы начальнік папраўчай установы адкрытага тыпу № 46.

Пра гэта паведаміла БелаПАН афіцыйны прадстаўнік упраўлення Следчага камітэта па Магілёўскай вобласці Аксана Саленюк.

Крымінальная справа па падазрэнні ў атрыманні хабару была ўзбуджаная 18 лютага.

Аксана Саленюк сказала, што адзін з тых, хто адбывае пакаранне ў папраўчай установе раней быў асуджаны па артыкуле аб растраце або прысваенні маёмасці на 3,5 гады пазбаўлення волі. Да канца тэрміну яму заставалася 10 месяцаў, і за добрыя паводзіны зняволены быў пераведзены ў папраўчую ўстанову адкрытага тыпу, вядомую ў народзе як «хімія».

Там у асуджанага пачаліся праблемы - за парушэнні парадку яму неаднаразова выносіліся спагнанні, якія рабіў начальнік установы. Неўзабаве начальнік прыгразіў яму магчымым узбуджэннем у дачыненні да яго крымінальнай справы па артыкуле аб ухіленні ад адбыцця пакарання ва ўстанове адкрытага тыпу. Гэта меркавала перавод асуджанага назад у месцы пазбаўлення волі з павелічэннем тэрміну пакарання. За пяць мільёнаў рублёў начальнік паабяцаў не ўзбуджаць справу.

Пры перадачы грошай ён быў затрыманы супрацоўнікамі ўпраўлення ўласнай бяспекі МУС. Цяпер начальнік знаходзіцца пад вартай, яму пагражае да сямі гадоў пазбаўлення волі.