Футбольных фанатаў прымусяць пісаць банеры па-руску?

Праваахоўныя органы могуць запатрабаваць ад заўзятараў дубляваць англамоўныя банеры на рускай мове.

Пра гэта заявіў намеснік начальніка ўпраўлення аховы правапарадку і прафілактыкі УУС Гомельскага аблвыканкама Сяргей Шапяцько 19 сакавіка на перадсезоннай нарадзе па пытаннях бяспекі правядзення футбольных матчаў, у якой прынялі ўдзел прадстаўнікі МУС, КДБ, пракуратуры, МНС, футбольныя заўзятары і адказныя работнікі ФК «Гомель».

Ён распавёў пра прапанаваныя новаўвядзенні ў рэгламенце па частцы бяспекі, якія федэрацыя футбола падала на абмеркаванне міліцыі. Акрамя ўжо знаёмых забарон, з'явіўся пункт аб неабходнасці дубляваць англійскія словы рускім перакладам на банерах і расцяжках і іншыя навіны. Як адзначыў Сяргей Шапяцько, абмеркаванне гэтай частцы рэгламенту сумесна з федэрацыяй намечана на бліжэйшы час.

Прадстаўнік УУС таксама сказаў, што яшчэ не позна абнавіць рэестр банераў і атрыбутыкі, каб пазбегнуць цяжкасцяў непасрэдна перад матчамі. Сяргей Шапяцько пракаментаваў і адкрыты ліст заўзятараў, апублікаваны раней. Па словах супрацоўніка міліцыі «паслабленняў у плане надгляду не будзе, так як практыка паказала: з групы актыўных фанатаў заўсёды знойдуцца некалькі, якія паспрабуюць пранесці забароненыя прадметы». Акрамя таго захаваецца і відэаздымка, таму што «грамадзянам, якія не парушаюць грамадскі парадак, баяцца, што іх здымуць на камеру ці перапішуць дадзеныя, няма сэнсу». Таксама захаваецца і ўдзел байцоў АМАПу ў даглядзе заўзятараў на тых сектарах, дзе, на думку міліцыі, спатрэбіцца павышаная ўвага.