Зміцер Вайцюшкевіч прадставіў прэм'еру песні «Жыве Беларусь!» (Аудыё)
7- 21.03.2013, 15:09
На канцэрце музыка заклікаў беларусаў да ўдзелу ў Дні Волі.
20 сакавіка Зміцер Вайцюшкевіч выступіў з чарговым дабрачынным канцэртам у офісе Партыі БНФ у Менску. Па словах самога спевака, такім чынам ён паспрабаваў заклікаць людзей удзельнічаць у акцыі ў Дзень Волі, правядзенне якой запланавана на 24 сакавіка. Падчас канцэрту Зміцер Вайцюшкевіч некалькі раз звярнуўся да слухачоў з заклікам быць актыўнымі ў нядзелю перад святам 25 сакавіка.
Заклікаючы людзей выходзіць на вуліцы, спявак прадставіў прэм'еру песні «Жыве Беларусь» на словы паэта Уладзіміра Някляева, паведамляе журналіст «Радыё Рацыя» Вольга Чарных.
Урачыстае шэсце і мітынг з нагоды Дня Волі пройдзе ў Менску ў нядзелю 24 сакавіка. Прадстаўнікі дэмакратычных сіл і інтэлігенцыя запрашаюць усіх неабыякавых беларусаў прыняць удзел ва ўрачыстасцях. Збор удзельнікаў запланаваны на 12 гадзін каля сталічнага кінатэатра «Кастрычнік».
