СК: У доме на Пляханава выбухнула сумесь метану з паветрам

Прычынай выбуху ў доме ў Серабранцы следчыя лічаць узгаранне газа-паветранай сумесі вялікай канцэнтрацыі.

Яна ўтварылася ў выніку змешвання бытавога газу метану з паветрам у жылых памяшканнях, паведамляе БелТА са спасылкай на Упраўленне Следчага камітэта Беларусі па Менску.

Следча-экспертным шляхам устаноўлена, што ў пацярпелых кватэрах адсутнічаюць сляды выбуховых рэчываў і абсталявання, якое працуе ад пераносных газавых балонаў.

У пацярпелым пад'ездзе праведзеныя тэставыя выпрабаванні ўсяго абсталявання, якое пастаўляе газ у кватэры.

Спецыяльная камісія вывучае вынікі даследаванняў з мэтай вызначыць, ці мела месца несанкцыянаваная ўцечка газу і, калі яна была, то ці магла канцэнтрацыя сумесі дасягнуць крытычнай, здольнай выклікаць узгаранне. Прызначаныя дадатковыя экспертызы.

Нагадаем, выбух у доме №85 на вуліцы Пляханава прагрымеў 23 лютага каля 17.00. Ударнай хваляй была разбураная сцяна з суседняй кватэрай, у выніку чаго адразу ў двух кватэрах адбыўся пажар. На месца здарэння аператыўна прыбылі супрацоўнікі МНС, брыгады хуткай дапамогі, аварыйная служба УП «Менгаз». Усяго да жылога будынку было накіравана больш за 30 адзінак спецтэхнікі. У адной з кватэр, якія пацярпелі ад выбуху, знойдзеныя целы дваіх чалавек. Выратаваныя 9 чалавек, 22 эвакуяваныя, з іх пяцёра нязначна пацярпелі, адну жыхарку з прыкметамі атручэння прадуктамі гарэння даставілі ў гарадскую клінічную бальніцу хуткай медыцынскай дапамогі, дзе яна знаходзілася непрацяглы час. Пасля ліквідацыі пажару высветлілася, што ў двух кватэрах разбураныя перагародкі і абрынуліся пліты перакрыцця на плошчы каля 30 кв.м.

Жыхарам пацярпелага пад'езда часова прадастаўленыя пакоі ў спецыяльным доме для ветэранаў, састарэлых і інвалідаў №1 па праспекце Ракасоўскага і гасцініцы Белдзяржцырка. Пастаўленая задача правесці работы ў максімальна, наколькі дазволіць тэхналогія, кароткія тэрміны. Як мяркуецца, на гэта спатрэбіцца не менш месяца.