Wall Street Journal: Расея пазбавіла ЗША магчымасці прадухіліць тэракт у Бостане

Расея не падзялілася з ЗША істотнай часткай інфармацыі аб падазроных у здзяйсненні бостанскіх тэрактаў.

Пра гэта заявілі амерыканскія ўлады. На іх думку, недавер паміж урадамі абедзвюх краін пазбавіў іх шанцу прадухіліць трагедыю, паведамляе The Wall Street Journal (пераклад - ИноТВ).

У 2011 годзе Расея папярэдзіла ФБР пра меркаванага тэрарыста па імі Тамерлан Царнаеў. ФСБ часткова грунтавалася на ліставанні яго маці з адным са сваякоў. Паводле гэтых дадзеных, Тамерлан Царнаеў быў зацікаўлены ў далучэнні да групы баевікоў, якіх расейскі ўрад абвінавачвае ў здзяйсненні тэрактаў на Паўночным Каўказе.

Улады ЗША называюць гэтае ліставанне самым істотным матэрыялам. Паведамляецца, што па крайняй меры ў адным з тэкставых паведамленняў абмяркоўваўся джыхад, зрэшты, без згадвання планаў тэрарыстаў.

Гэтыя дадзеныя паступілі ў распараджэнне амерыканскіх уладаў амаль праз тыдзень пасля тэрактаў у Бостане, сцвярджае The Wall Street Journal. На думку некаторых службовых асоб, калі б гэтыя звесткі былі атрыманыя своечасова, на братоў Царнаевых звярнулі б больш пільную ўвагу.

Майк Роджэрс, кіраўнік камітэта Палаты прадстаўнікоў па выведцы, заявіў, што гэтая інфармацыя «дазволіла б ФБР пачаць расследаванне, каб прасачыць сувязі Царнаева».

Крэмль сцвярджае, што расейскія спецслужбы сабралі мала дадзеных аб Царнаеве, у той час як улады Дагестана сцвярджаюць, што сачылі за падазраваным падчас яго паўгадавой паездкі ў рэспубліку ў 2012 годзе. Па іх звестках, меркаваны тэрарыст сустракаўся з вядомым баевіком, аднак Расея не паведаміла пра гэта ЗША, піша газета.

Прэс-сакратар расейскага прэзідэнта Дзмітрый Пяскоў заявіў, што ў 2011 годзе ў ФСБ не магло быць падрабязнай інфармацыі аб Царнаеве, так як ён жыў за межамі Расеі.

Як бы там ні было, адзначае карэспандэнт газеты, супрацоўніцтва паміж расейскімі і амерыканскімі спецслужбамі ў апошнія тыдні значна палепшылася. Тым не менш, прадстаўнікі ЗША сцвярджаюць, што «рускія не аказваюць поўнага садзейнічання» і, у прыватнасці, усё яшчэ не далі інфармацыю аб знаходжанні Царнаева-старэйшага ў Дагестане.

У выніку тэракту падчас Бостанскага марафону 15 красавіка загінулі тры чалавекі, у тым ліку дзіця, раненні атрымалі амаль 200 чалавек.