«Дэпутаты» адказалі з нагоды МПР: Не ўяўляецца магчымым
8- 11.05.2013, 18:32
Брэсцкія актывісты кампаніі «Гавары праўду» атрымалі адказы ад дэпутатаў «палаты прадстаўнікоў» з нагоды малога прымежнага руху з Польшчай.
На дадзены момант з чатырох «дэпутатаў» ліст у адказ даслалі толькі двое - Ларыса Багдановіч і Уладзімір Базанаў.
Віктар Валюшыцкі і Валянцін Мілашэўскі лісты не даслалі.
Актывістамі было пастаўленае «дэпутатам» пытанне аб тым, чаму тыя падчас штогадовага паслання Лукашэнкі беларускаму народу не пацікавіліся, у якія тэрміны будзе рэалізаваны малы памежны рух з Польшчай. Уладзімір Базанаў прыклаў адказ па гэтым пытанні, падпісаны асабіста намеснікам прэм'ер-міністра Пятром Пракаповічам.
Дзяржаўны служачы растлумачыў сітуацыю тым, што на дадзены момант адначасовая рэалізацыя малога прымежнага руху з Польшчай, Літвой і Латвіяй не ўяўляецца магчымым з-за шэрагу абставін. Сярод іх - цяжкасці для беларускага боку ў арганізацыйным, тэхнічным і фінансавым плане.