Лельчыцкіх школьнікаў кармілі пратэрмінаваным мясам
16- 2.05.2013, 16:33
Дзяцей кармілі прадуктамі, вырабленымі з паўфабрыкатаў са скончаным тэрмінам прыдатнасці.
Парушэнні заканадаўства выяўленыя Камітэтам дзяржкантролю пры праверцы Лельчыцкага райпо (раённага спажывецкага таварыства), піша БелаПАН.
У ходзе праверкі ўстаноўленыя факты сістэматычных паставак паўфабрыкатаў ва ўстановы адукацыі для арганізацыі харчавання дзяцей у школах і дашкольных установах паўфабрыкатаў з мінулымі тэрмінамі прыдатнасці.
Так, ва ўстановы адукацыі раёна са студзеня па кастрычнік 2012 года было адгружана 4,5 т пратэрмінаваных мясных паўфабрыкатаў і катлетнага мяса больш чым на 250 млн. рублёў, а за студзень-люты 2013 года - 0,4 т на 25,9 млн. рублёў. Акрамя таго, у 12 рознічных гандлёвых аб'ектах райпо з 18 правераных устаноўленыя розныя парушэнні заканадаўства: продаж тавараў з мінулымі тэрмінамі прыдатнасці, адсутнасць цэннікаў на таварах і іншыя парушэнні.
Па выніках праверкі Камітэтам дзяржкантролю вобласці за дадзеныя і іншыя парушэнні да адміністрацыйнай адказнасці прыцягнуты 16 службовых асоб райпо.